மத்திய கல்வி அமைச்சர் தர்மேந்திர பிரதான் பதவி விலகக்கோரி, ராஜஸ்தான் மாநிலம் ஜெய்ப்பூரில் இன்று ஒரு முக்கியப் போராட்டம் நடைபெற்றது. நீட்தேர்வு குளறுபடிகள் மற்றும் சிபிஎஸ்இ ஓஎஸ்எம் உள்ளிட்ட நாட்டின் பல்வேறு முக்கியப் பிரச்சினைகளை முன்வைத்து இப்போராட்டம் முன்னெடுக்கப்பட்டது. இந்திய தலைமை நீதிபதி சூர்யகாந்தின் ஒற்றை விமர்சனத்தின் பின்னணியில் உருவான இக்கட்சியினர், மத்திய அரசுக்கு எதிராகத் தங்களது கண்டனங்களை மிகத்தீவிரமாகப் பதிவு செய்து வந்தனர்.
ஜெய்ப்பூரில் நடைபெற்ற இந்த ஆர்ப்பாட்டத்தில் கட்சியின் தலைவர் அபிஜீத் தீப்கே கலந்துகொண்டு தொண்டர்கள் மத்தியில் உரையாற்றினார். அபிஜீத் தீப்கே பேசிக்கொண்டிருந்த போதே, கூட்டத்திற்குள் புகுந்த சிலர் திடீரென பாய்ந்து சென்று அவரது கழுத்தில் இருந்த துணியை இழுத்து, அவரது கன்னத்தில் பலமுறை மாறி மாறி பயங்கரமாக அறைந்தனர். இந்தத் திடீர் தாக்குதலால் அங்கு பெரும் பரபரப்பும், சலசலப்பும் ஏற்பட்டது.
இந்தத் தாக்குதல் சம்பவத்தை அடுத்து, அங்கு பாதுகாப்புப் பணியில் ஈடுபட்டிருந்த காவல்துறையினர் உடனடியாகத் தலையிட்டு நிலைமையைக் கட்டுக்குள் கொண்டு வந்தனர். மேலும், இச்சம்பவம் தொடர்பாக இரண்டு பேரை போலீசார் உடனடியாகக் கைது செய்து விசாரணை நடத்தி வருகின்றனர். இதனிடையே, இத்தாக்குதல் குறித்து கருத்து தெரிவித்துள்ள அபிஜீத் தீப்கே, இதுபோன்ற வன்முறைகளால் தங்களது போராட்டத்தை ஒடுக்கிவிட முடியாது என்று உறுதியுடன் தெரிவித்துள்ளார்.