திண்டுக்கல் மாவட்டம் கொடைக்கானல் பகுதியில் ஆளுங்கட்சியான திமுகவிற்குப் பலத்த பின்னடைவு ஏற்படும் வகையில், அக்கட்சியைச் சேர்ந்த 50-க்கும் மேற்பட்ட நிர்வாகிகள் மற்றும் தொண்டர்கள் திடீரென திமுகவிலிருந்து விலகியுள்ளனர். அவர்கள் அனைவரும் நடிகர் விஜய் தலைமையிலான தமிழக வெற்றிக் கழகத்தில் (தவெக) தங்களை முறைப்படி இணைத்துக் கொண்டனர். இதற்காக இன்று (ஜூன் 6) நடைபெற்ற சிறப்பு வரவேற்பு நிகழ்ச்சியில், தவெக மாவட்ட மற்றும் உள்ளூர் நிர்வாகிகள் நேரில் கலந்துகொண்டு, புதிதாகக் கட்சியில் இணைந்தவர்களுக்கு மலர்தூவி, சால்வை அணிவித்து உற்சாகமாக வரவேற்றனர்.
திமுகவில் நீண்ட காலமாகப் பணியாற்றி வந்த உடன்பிறப்புகள் திடீரென தவெக நோக்கி நகர்வது அரசியல் வட்டாரத்தில் பெரும் பரபரப்பை ஏற்படுத்தியுள்ளது. கொடைக்கானல் மட்டுமல்லாமல், தமிழகத்தின் பல்வேறு பகுதிகளிலும் திமுகவினர் பலரும் தொடர்ச்சியாக மாற்றுக்கட்சியான தவெகவில் இணைந்து வருவதாகக் கூறப்படுகிறது. இதனால் திமுகவின் உள்ளூர் முக்கிய நிர்வாகிகள் மற்றும் கட்சியின் தலைமை கடும் அதிர்ச்சியிலும் கவலையிலும் ஆழ்ந்துள்ளதாக அரசியல் நோக்கர்கள் கருத்து தெரிவித்து வருகின்றனர்.