பாஜகவிலிருந்து விலகி தமிழக பாஜக முன்னாள் தலைவர் அண்ணாமலை புதிய கட்சி தொடங்கப்போவதாக சமூக வலைதளங்களில் வெளியாகி வரும் தகவல்கள் தற்பொழுது பெரும் பரபரப்பை ஏற்படுத்தியுள்ளன. அவர் தொடங்கவிருக்கும் புதிய கட்சியின் பெயர் ‘பாரத மக்கள் கழகம்’ (BMK) என்றும், அதன் கொடியில் கோயில் கோபுரம் மற்றும் வேல் சின்னங்கள் இடம்பெற்றிருப்பதாகவும் கூறி அவரது ஆதரவாளர்கள் அது தொடர்பான படங்களை இணையத்தில் வேகமாகப் பகிர்ந்து வருகின்றனர்.
பொதுவாகத் தன் மீதான விமர்சனங்களுக்கும் வதந்திகளுக்கும் சமூக வலைதளங்களில் உடனுக்குடன் பதிலளிக்கும் அண்ணாமலை, ஒட்டுமொத்த அரசியல் வட்டாரத்திலும் இவ்வளவு பெரிய விவாதம் ஓடிக்கொண்டிருக்கும் போதிலும், இந்த விவகாரத்தில் இதுவரை எந்தவொரு மறுப்பும் தெரிவிக்காமல் தொடர்ந்து மௌனம் காப்பது பாஜக தலைமை மற்றும் நிர்வாகிகளிடையே பெரும் அதிர்ச்சியையும், தமிழக அரசியலில் பல்வேறு விவாதங்களையும் ஏற்படுத்தியுள்ளது.