தமிழக அரசியலில் பெரும் பரபரப்பை ஏற்படுத்தியுள்ள விடுதலைச் சிறுத்தைகள் கட்சி (விசிக) மற்றும் திமுக இடையேயான கருத்து மோதலை இந்த விவகாரம் வெளிச்சத்திற்கு கொண்டுவந்துள்ளது. தமிழக வெற்றிக் கழகத்தின் (தவெக) அமைச்சரவையில் விசிக பங்கேற்பதாக அக்கட்சியின் தலைவர் திருமாவளவன் அறிவித்ததைத் தொடர்ந்து, அக்கட்சியின் முக்கிய நிர்வாகியான வன்னியரசு, முதலமைச்சர் விஜய் முன்னிலையில் அமைச்சராகப் பதவி ஏற்றுக்கொண்டார். பல ஆண்டுகளாக திமுக கூட்டணியில் நீடித்துவந்த விசிக, தற்போது தவெக-வுடன் கைகோர்த்து ஆட்சியில் பங்கு பெற்றுள்ளது தமிழக அரசியல் களத்தில் ஒரு முக்கிய திருப்பமாகப் பார்க்கப்படுகிறது.
விசிகவின் இந்த அதிரடி முடிவுக்கு திமுக தரப்பில் கடும் எதிர்ப்புகள் கிளம்பியுள்ளன. திமுக நாடாளுமன்ற உறுப்பினர் ஆ.ராசா தனது எக்ஸ் (ட்விட்டர்) பக்கத்தில், விசிகவை மறைமுகமாகச் சாடி ஒரு பதிவை வெளியிட்டார். அதில், முன்னேறுவதற்காகத் தரப்பட்ட ஏணியும், சாதியை ஒழிக்க வேண்டிய சிறுத்தையும் வெறும் ‘விசில்’ சத்தத்திற்கு (தவெக-வின் சின்னம் அல்லது அடையாளம்) முட்டுக்கொடுப்பதாகக் விமர்சித்தார். மேலும், தங்களை ஆதரித்தவர்களைப் புறந்தள்ளிவிட்டு வேறு இடம் தேடுவதாகக் குறிப்பிட்ட அவர், தற்காப்புக்காகப் பெரியாரின் கொள்கை வழியில் காத்திருந்தாலும், களத்தில் நின்று போராடுவோம் என்று ஆக்ரோஷமாகப் பதிவிட்டிருந்தார்.
ஆ.ராசாவின் இந்த கடுமையான விமர்சனத்திற்கு விசிகவின் பொருளாளர் பாலாஜி உடனடியாகப் பதிலடி கொடுத்துள்ளார். எளிய மக்களுக்கு அதிகாரம் கிடைப்பதில் ஏன் இவ்வளவு ஆத்திரம் என்றும், இந்த ஆதங்கத்தால் அள்ளிவீசப்படும் அவதூறுகள் தங்களை எதுவும் செய்துவிடாது என்றும் அவர் தனது எக்ஸ் பக்கத்தில் பதிவிட்டுள்ளார். மேலும், அநாகரிகத்தைத் தவிர்க்கவே தாங்கள் அமைதி காப்பதாகவும், அநீதி தொடர்ந்து நீடித்து தாங்கள் உண்மைகளைப் பேசத் தொடங்கினால் திமுகவினர் அணைக்க முடியாத நெருப்பில் தகித்துப்போவார்கள் என்றும் மிகவும் எச்சரிக்கை கலந்த தொனியில் பாலாஜி பதில் அளித்துள்ளார்.