தமிழக அரசியலில் தற்போது ஏற்பட்டுள்ள அதிரடி மாற்றங்களை பா.ஜ.க தலைமை உன்னிப்பாக கவனித்து வரும் நிலையில், “என்ன நடக்கிறது என்பதை இன்னும் சில மாதங்களுக்கு அமைதியாக வேடிக்கை பார்ப்போம்” என்று மத்திய உள்துறை அமைச்சர் அமித் ஷா தெரிவித்துள்ளதாக அரசியல் வட்டாரங்களில் பேசப்படுகிறது. தமிழகத்தில் திமுகவின் சிறுபான்மையின வாக்கு வங்கியை தமிழக வெற்றிக் கழகம் (தவெக) கணிசமாகப் பிரித்துள்ளதாலும், பிரதான எதிர்க்கட்சியான அதிமுகவிற்குள் தொடர்ந்து பிளவுகளும் குழப்பங்களும் நீடிப்பதாலும், அங்கு பா.ஜ.க தனித்து வளர்வதற்கோ அல்லது புதிய அரசியல் வியூகங்களை வகுப்பதற்கோ சாதகமான களம் உருவாகியுள்ளதாக தமிழக பா.ஜ.க தரப்பில் டெல்லி தலைமைக்கு அறிக்கை அனுப்பப்பட்டுள்ளது.
இந்தச் சூழலில்தான், அவசரப்பட்டு எந்த முடிவும் எடுக்காமல், தமிழக அரசியல் களம் முழுமையாக ஒரு தெளிவான வடிவத்திற்கு வரும் வரை இன்னும் சில மாதங்கள் பொறுத்திருந்து காய்களை நகர்த்துவதே சரியாக இருக்கும் என அமித் ஷா அறிவுறுத்தியுள்ளதாகக் கூறப்படுகிறது.