தமிழக அரசியல் வரலாற்றில் ஒரு முக்கியத் திருப்புமுனையாக, தமிழக வெற்றிக் கழகத்தின் தலைவர் ஜோசப் விஜய் தமிழகத்தின் 18-வது முதலமைச்சராக இன்று பதவியேற்றார். சென்னை நேரு உள்விளையாட்டு அரங்கில் நடைபெற்ற பிரம்மாண்ட விழாவில், 120 எம்.எல்.ஏ-க்களின் ஆதரவுடன் ஆளுநர் அர்லேகர் முன்னிலையில் அவர் பொறுப்பேற்றுக்கொண்டார். விஜய்யுடன் சேர்த்து என்.ஆனந்த், ஆதவ் அர்ஜுனா, செங்கோட்டையன் உள்ளிட்ட ஒன்பது அமைச்சர்களும் இன்று பதவிப் பிரமாணம் செய்துகொண்டனர். திரைத்துறையில் இருந்து அரசியல் அரியணை ஏறியுள்ள விஜய்யின் இந்த புதிய பயணம், மாநிலம் முழுவதும் பெரும் எதிர்பார்ப்பை ஏற்படுத்தியுள்ளது.
இந்த மகிழ்ச்சிகரமான தருணத்திற்கு மத்தியிலும், லாட்டரி அதிபர் மார்ட்டின் குடும்பத்தைச் சேர்ந்தவர்களுக்கு இடையிலான மோதல் அரசியல் வட்டாரத்தில் சலசலப்பை உருவாக்கியுள்ளது. இம்முறை தேர்தலில் மார்ட்டின் குடும்பத்தைச் சேர்ந்த மூன்று பேர் வெற்றி பெற்றுள்ளனர். புதுச்சேரி காமராஜ் நகர் தொகுதியில் லட்சிய ஜனநாயகக் கட்சி சார்பில் போட்டியிட்ட மார்ட்டின் மகன் ஜோஸ் சார்லஸ் மார்ட்டின், தமிழகத்தில் அதிமுக சார்பில் போட்டியிட்ட லீமா ரோஸ் மார்ட்டின் மற்றும் தவெக சார்பில் வில்லிவாக்கத்தில் வென்ற ஆதவ் அர்ஜுனா என ஒரே குடும்பத்திலிருந்து மூன்று எம்.எல்.ஏ-க்கள் தேர்வாகியுள்ளது ஒரு சாதனையாகப் பார்க்கப்படுகிறது.
இருப்பினும், ஆதவ் அர்ஜுனாவுக்கும் அவரது மைத்துனரான ஜோஸ் சார்லஸ் மார்ட்டினுக்கும் இடையே நீண்டகாலமாக நிலவி வரும் கருத்து வேறுபாடு தற்போது பகிரங்கமாக வெடித்துள்ளது. ஆதவ் அர்ஜுனா கேபினட் அமைச்சராகப் பொறுப்பேற்றுள்ள நிலையில், அவரை விமர்சித்து ஜோஸ் சார்லஸ் மார்ட்டின் அளித்துள்ள பேட்டி வைரலாகி வருகிறது. “ஆதவ் அர்ஜுனா எந்தத் தவறும் செய்யாமல், காசு அடிக்காமல் முதல்வர் விஜய் தான் அவரை கவனமாகப் பார்த்துக்கொள்ள வேண்டும்; இல்லையென்றால் தவறான வழிகளில் கமிஷன் பெற்று நாட்டுக்கே இழப்பை ஏற்படுத்திவிடுவார்” என அவர் நேரடியாகவே குற்றம் சாட்டியுள்ளார்.
சொந்த மைத்துனரே ஒரு புதிய அமைச்சரைப் பற்றி இவ்வளவு கடுமையான விமர்சனங்களை முன்வைப்பது அரசியல் தளத்தில் அதிர்ச்சியை ஏற்படுத்தியுள்ளது. ஊழலற்ற நிர்வாகத்தைத் தருவதாகக் கூறி ஆட்சியில் அமர்ந்துள்ள முதல்வர் விஜய், தன் அமைச்சரவை சகாக்கள் மீதான இத்தகைய புகார்களை எப்படிக் கையாளப் போகிறார் என்பதே இப்போது அரசியல் விமர்சகர்களின் கேள்வியாக உள்ளது. ஒருபுறம் ஆட்சி அதிகாரத்தைக் கைப்பற்றிய உற்சாகம் இருந்தாலும், மறுபுறம் குடும்ப உறுப்பினர்களுக்கு இடையிலான இந்த மோதல் தவெக அரசுக்குத் தொடக்கத்திலேயே ஒரு சவாலாக மாறியுள்ளது.