சமூக வலைதளங்களில் வைரலாகி வரும் ஒரு வீடியோவில், இந்திய பயணி ஒருவர் விமான நிலையத்தின் காத்திருப்புப் பகுதியில் உள்ள மேஜை மீது தனது கால்களை வைத்து ஓய்வெடுப்பதைக் காண முடிகிறது. பயணிகள் அமர்வதற்கும் பொருட்களை வைப்பதற்கும் பயன்படுத்தப்படும் பொதுவான மேஜையை அவர் தனது வசதிக்காகப் பயன்படுத்தியது அங்கிருந்த மற்ற பயணிகளிடையே முகம் சுளிப்பை ஏற்படுத்தியது. இந்த வீடியோ எக்ஸ் (X) தளத்தில் பகிரப்பட்டதைத் தொடர்ந்து பெரும் விவாதம் வெடித்தது.
இந்தச் செயலைக் கண்டித்து பல நெட்டிசன்கள் கருத்துத் தெரிவித்து வருகின்றனர். “பணம் இருந்தால் மட்டும் போதாது, பொது இடங்களைப் பயன்படுத்தும் அடிப்படை நாகரீகமும் அவசியம்” என்று பலர் சாடியுள்ளனர். வெளிநாடுகளுக்குச் செல்லும் இந்தியர்கள் இது போன்ற செயல்களில் ஈடுபடுவது இந்தியாவின் பிம்பத்தை உலக அளவில் பாதிக்கும் என்று கவலை தெரிவித்துள்ள பயனர்கள், பொது இடங்களில் எப்படி நடந்துகொள்ள வேண்டும் என்பது குறித்த விழிப்புணர்வு அவசியமானது என வலியுறுத்தியுள்ளனர்.
மறுபுறம், ஒரு சிலர் நீண்ட தூரப் பயணத்தின் போது ஏற்படும் களைப்பால் அவர் அப்படிச் செய்திருக்கலாம் என்று கூறினாலும், அதற்குப் பொது மேஜையைத் தேர்ந்தெடுத்தது தவறு என்றே பெரும்பான்மையானோர் கருத்துத் தெரிவிக்கின்றனர். இந்தச் சம்பவம், விமான நிலையங்கள் போன்ற பொது இடங்களில் சக பயணிகளுக்கு இடையூறு விளைவிக்காமல் நடந்து கொள்வதன் முக்கியத்துவத்தை மீண்டும் ஒருமுறை சமூக வலைதள விவாதமாக மாற்றியுள்ளது.