சர்வதேச நிதிச் சந்தையில் தற்போது நிலவும் பதற்றத்திற்கு ஈரானிய நாடாளுமன்ற சபாநாயகர் முகமது பாகர் கலிபாஃபின் கருத்துக்கள் முக்கிய காரணியாக மாறியுள்ளன. ஈரான் – இஸ்ரேல் மோதல் தீவிரமடைந்துள்ள சூழலில், வளைகுடா நாடுகளுக்கு ‘கரன்சி ஸ்வாப் லைன்’ (Currency Swap Line) வசதியை வழங்க அமெரிக்கா காட்டும் ஆர்வம், ஒரு தற்காப்பு நடவடிக்கையாகவே பார்க்கப்படுகிறது. சர்வதேச நிதியத்தின் கீதா கோபிநாத் சுட்டிக்காட்டிய பொருளாதார அழுத்தங்களை கலிபாஃப் வழிமொழிந்துள்ளார். போர்ச் சூழலால் எண்ணெய் விநியோகம் பாதிக்கப்படும் போது ஏற்படும் டாலர் பற்றாக்குறையை ஈடுகட்ட, நாடுகள் தங்களின் அமெரிக்க முதலீடுகளை (பங்குகள் மற்றும் பத்திரங்கள்) ஒட்டுமொத்தமாக விற்பனை செய்வதைத் தடுக்கவே இந்த “நிதி ஆக்ஸிஜன்” வழங்கப்படுவதாக அவர் விமர்சித்துள்ளார்.
இந்த கரன்சி ஸ்வாப் லைன் ஒப்பந்தம் என்பது ஒரு நாட்டின் அவசரகால டாலர் தேவையை உடனடியாகப் பூர்த்தி செய்யும் கருவியாகும். தற்போதைய பதற்றமான சூழலில், ஐக்கிய அரபு அமீரகம் போன்ற வளைகுடா நாடுகளுக்கு டாலர் கையிருப்பு தேவைப்படும்போது, அவர்கள் அமெரிக்க சந்தையில் உள்ள தங்கள் முதலீடுகளை விற்க முற்படுவார்கள். அவ்வாறு பெரும் அளவில் முதலீடுகள் வெளியேறினால் அமெரிக்கப் பொருளாதாரம் நிலைகுலையும் என்பதால், அமெரிக்கா தானாக முன்வந்து இந்த கடன்களை வழங்க முன்வருகிறது. இது சந்தையைச் சீராக வைத்திருப்பது போலத் தோன்றினாலும், உண்மையில் முதலீட்டாளர்கள் வெளியேறுவதைத் தடுத்து, அமெரிக்கச் சொத்துக்களின் மதிப்பைத் செயற்கையாகத் தக்கவைக்கும் முயற்சி என்று கலிபாஃப் எச்சரிக்கிறார்.
கலிபாஃபின் கூற்றுப்படி, அமெரிக்கப் பத்திரச் சந்தைதான் இந்தப் போரின் உண்மையான போர்க்களமாக மாறியுள்ளது. முதலீட்டாளர்கள் தங்கள் சொத்துக்களை விற்க விரும்பினாலும், ஒரு குறிப்பிட்ட சதவீதத்திற்கு மேல் விற்க அனுமதி மறுக்கப்படுவதாகவும், சந்தை சரிவை நோக்கிச் சென்றால் விற்பனைக்கான ஜன்னல்கள் (Trading Windows) மூடப்படலாம் என்றும் அவர் பகீர் தகவலை வெளியிட்டுள்ளார். “இப்போதே வெளியேறுங்கள்” என்ற அவரது எச்சரிக்கை, அமெரிக்காவின் பொருளாதாரக் கட்டமைப்பில் உள்ள ஓட்டைகளை வெளிச்சம் போட்டுக் காட்டுகிறது. அமெரிக்கப் பொருளாதாரத் துறைச் செயலாளர் ஸ்காட் பெசென்ட் இந்த ஸ்வாப் லைன் திட்டத்தை ஆதரிப்பதன் மூலம், அமெரிக்காவின் இந்த மறைமுக வியூகம் உறுதிப்படுத்தப்பட்டுள்ளது.
இந்த உலகளாவிய நிதிப் போர் இந்தியாவையும் விட்டுவைக்காது. ஹார்முஸ் நீரிணையில் ஏற்படும் பாதிப்புகள் எண்ணெய் விலையை விண்ணைத் தொடச் செய்யும், இது இந்தியாவில் பணவீக்கத்தை அதிகரித்து சாதாரண மக்களின் வாழ்வாதாரத்தைப் பாதிக்கும். போர் நிறுத்தத்தை நோக்கிச் செல்ல வேண்டிய அமெரிக்கா, இத்தகைய நிதி மேலாண்மைக் கருவிகள் மூலம் போர்க்கால நெருக்கடியைத் தள்ளிப்போட முயல்வது உலகப் பொருளாதாரத்திற்கு ஆபத்தான ஒன்றாகவே முடியும். அமெரிக்க முதலீட்டுச் சந்தை வீழ்ச்சியடைந்தால் மட்டுமே டிரம்ப் போன்ற தலைவர்கள் போர் நிறுத்தத்தை துரிதப்படுத்துவார்கள் என்ற சூழலில், ஸ்வாப் லைன்கள் போரை நீட்டிக்க உதவும் ஒரு கருவியாகவே உருவெடுத்துள்ளன.