தமிழ்நாட்டில் தேர்தல் களம் சூடுபிடித்துள்ள நிலையில், நெல்லை மாவட்டம் ராதாபுரத்தில் திமுக வேட்பாளர் அப்பாவு தீவிர வாக்குச் சேகரிப்பில் ஈடுபட்டார். அப்போது, அங்கு திரண்டிருந்த இளைஞர்கள் அவரிடம் கடந்த ஐந்து ஆண்டுகால வாக்குறுதிகள் குறித்து சரமாரியாகக் கேள்வி எழுப்பினர். “தாமிரபரணி தண்ணீரை ராதாபுரத்திற்கு கொண்டு வருவேன் என்று கடந்த முறையும் இதே வாக்குறுதியைத்தான் கொடுத்தீர்கள், இப்போது மீண்டும் அதையே சொல்கிறீர்களா?” எனக் கூறி அவரை வெளிப்படையாகக் கிண்டல் செய்தனர்.
இளைஞர்களின் இந்தத் திடீர் எதிர்ப்பால் கடும் அதிருப்தி அடைந்த அப்பாவு, ஒருகட்டத்தில் பொறுமை இழந்து ஆவேசமாகப் பேசினார். “எனக்கு ஓட்டு போட்டால் போடுங்கள்.. இல்லையென்றால் போடாதீர்கள்” என்று கோபத்துடன் கூறிவிட்டு, அங்கிருந்து பாதியிலேயே தனது பரப்புரையை முடித்துக் கொண்டு சென்றார். தேர்தல் நேரத்தில் வேட்பாளர் ஒருவரே வாக்காளர்களிடம் “ஓட்டு போட வேண்டாம்” எனக் கூறியுள்ள இந்தச் சம்பவம் நெல்லை அரசியல் வட்டாரத்தில் பெரும் பரபரப்பை ஏற்படுத்தியுள்ளது.