தற்போது சமூக வலைதளங்களில் வெளியாகி வரும் நடிகை ‘காதல்’ மல்லேஸ்வரியின் வீடியோ, திரையுலகினரையும் ரசிகர்களையும் பெரும் சோகத்தில் ஆழ்த்தியுள்ளது. தமிழ், தெலுங்கு, மலையாளம் எனப் பல மொழிகளில் 40-க்கும் மேற்பட்ட படங்களில் நடித்தவர் மல்லேஸ்வரி. குறிப்பாக, தமிழ் சினிமாவின் நகைச்சுவை ஜாம்பவான்களான கவுண்டமணி மற்றும் செந்தில் ஆகியோருடன் இவர் நடித்த காட்சிகள் இன்றும் ரசிகர்களால் ரசிக்கப்படுபவை. ‘வில்லாதி வில்லன்’ படத்தில் கவுண்டமணி இவரைப் பார்த்து “எந்த கடையில நீ அரிசி வாங்கின?” என்று பாடும் காட்சி முதல் பல படங்களில் தனது இயல்பான நடிப்பால் இவர் முத்திரை பதித்துள்ளார்.
பல படங்களில் இவர் நடித்திருந்தாலும், 2004-ம் ஆண்டு வெளியான ‘காதல்’ திரைப்படம் இவருக்கு மிகப்பெரிய அடையாளத்தை வழங்கியது. அதில் நடிகை சந்தியாவின் அம்மாவாக நடித்த இவரது எதார்த்தமான நடிப்பு, இவரை ‘காதல் மல்லேஸ்வரி’ என்று ரசிகர்கள் மத்தியில் பிரபலமாக்கியது. கூலி, கட்டபொம்மன், அரவான், தோட்டா, உடன்பிறப்பு போன்ற பல வெற்றிப் படங்களில் சிறு சிறு வேடங்களில் தோன்றினாலும், தனது கனிவான நடிப்பால் மக்களின் கவனத்தை ஈர்த்த ஒரு கலைஞராகவே இவர் இருந்து வந்தார்.
தற்போது இந்த பழம்பெரும் நடிகை கடும் உடல்நலக் குறைவால் பாதிக்கப்பட்டு சென்னை ஓமந்தூரார் அரசு பன்நோக்கு மருத்துவமனையில் அனுமதிக்கப்பட்டுள்ளார். அவருக்கு நுரையீரலில் தீவிர தொற்று ஏற்பட்டுள்ளதால், கடந்த 20 நாட்களுக்கும் மேலாக மூச்சு விட முடியாமல் அவதிப்பட்டு வருகிறார். தற்போது செயற்கை சுவாசக் கருவியின் (Oxygen support) உதவியுடன்தான் அவர் உயிர் பிழைத்து வருவதாகவும், மருத்துவமனையின் ஆறாவது மாடியில் உள்ள பெண்கள் வார்டில் அவர் சிகிச்சை பெற்று வருவதாகவும் தகவல்கள் வெளியாகியுள்ளன.
மருத்துவமனையில் இருந்தபடியே மல்லேஸ்வரி வெளியிட்டுள்ள உருக்கமான வீடியோ பலரையும் கண்கலங்க வைத்துள்ளது. அதில், மூச்சு விடவே மிகவும் சிரமப்படுவதாகவும், ஒரு பக்கம் உடல்நிலை சரியில்லாமல் அவதிப்படும் நிலையில், மறுபக்கம் ஒரு வேளை உணவிற்கே வழியில்லாமல் வறுமையில் வாடுவதாகவும் அவர் கண்ணீர் மல்கக் கூறியுள்ளார். சினிமாவில் ஒரு காலத்தில் பிஸியாக இருந்த நடிகை, இன்று அடிப்படைத் தேவைகளுக்கே வழியில்லாமல் தவித்து வருவது திரையுலகின் மறுபக்கத்தைக் காட்டுவதாக உள்ளது.
தனது சிகிச்சைக்கும் உணவுக்கும் நிதி உதவி தேவைப்படுவதால், தாராள உள்ளம் கொண்டவர்கள் தனக்கு உதவ வேண்டும் என அவர் கோரிக்கை விடுத்துள்ளார். தனது கூகுள் பே (GPay) எண்ணையும் அந்த வீடியோவில் பகிர்ந்துள்ள அவர், தனது வாழ்வாதாரத்திற்காக ரசிகர்களின் உதவியை எதிர்பார்த்துக் காத்திருக்கிறார். ஒரு காலத்தில் திரையில் நம்மை மகிழ்வித்த இந்த கலைஞரின் தற்போதைய நிலையை அறிந்து, திரைத்துறையினரும் சமூக ஆர்வலர்களும் அவருக்கு உதவ முன்வர வேண்டும் என்பதே அனைவரின் எதிர்பார்ப்பாக உள்ளது.