மலையாளத் திரையுலகின் மெகா ஸ்டார் மம்மூட்டி, கடந்த ஆண்டு தான் சந்தித்த உடல்நலப் பாதிப்புகள் குறித்து முதல்முறையாக மனம் திறந்து பேசியுள்ளார். கொச்சியில் நடைபெற்ற தனது தொண்டு நிறுவன விழாவில் கலந்துகொண்ட அவர், நீண்ட காலமாகத் தன்னால் எதையும் நுகரவோ அல்லது உணவின் சுவையை அறியவோ முடியவில்லை என்று உருக்கமாகத் தெரிவித்தார். கடந்த 2025-ஆம் ஆண்டு மம்மூட்டிக்கு புற்றுநோய் பாதிப்பு ஏற்பட்டதாக வதந்திகள் பரவிய நிலையில், தான் சுவை மற்றும் வாசனை அறியும் திறனைத் தற்காலிகமாக இழந்திருந்தது உண்மைதான் என்று அவர் தற்போது உறுதிப்படுத்தியுள்ளார்.
கண் பார்வை மற்றும் கேட்கும் திறன் போலவே வாசனை மற்றும் சுவை உணர்வுகளும் மனித வாழ்க்கையில் மிக முக்கியமானவை என்பதை இந்த பாதிப்பின் போது தான் உணர்ந்ததாக மம்மூட்டி குறிப்பிட்டார். “ஒரு விஷயத்தை நாம் இழக்கும்போதுதான் அதன் மதிப்பை உணர்கிறோம்” என்று கூறிய அவர், தற்போது அந்த உணர்வுகள் மெல்ல மெல்லத் தனக்குத் திரும்பி வருவதாகவும் மகிழ்ச்சியுடன் தெரிவித்துள்ளார். இந்தச் செய்தி அவரது ரசிகர்கள் மத்தியில் பெரும் நிம்மதியையும் நெகிழ்ச்சியையும் ஏற்படுத்தியுள்ளது.