செயற்கை நுண்ணறிவுத் துறையில் கூகுள் மற்றும் ஓபன் ஏஐ நிறுவனங்களுக்குப் போட்டியாக, மெட்டா நிறுவனம் தனது ‘சூப்பர் இன்டலிஜென்ஸ் லேப்’ மூலம் புதிய ஏஐ மாடல்களை உருவாக்கியுள்ளது. ‘அவகேடோ’ மற்றும் ‘மேங்கோ’ என ரகசியக் குறியீட்டுப் பெயரிடப்பட்டுள்ள இந்த மேம்பட்ட தொழில்நுட்பங்கள், எழுத்து மற்றும் வீடியோ உருவாக்கத்தில் புரட்சியை ஏற்படுத்தும் என எதிர்பார்க்கப்படுகிறது. மெட்டாவின் தொழில்நுட்பத் தலைவர் ஆண்ட்ரூ போஸ்வொர்த், இந்த ஆய்வகத்தின் அபார வளர்ச்சியை உலகப் பொருளாதார மன்றத்தில் உறுதிப்படுத்தியுள்ளார்.
கடந்த கால முதலீடுகளின் பலனாக 2026-ம் ஆண்டு மெட்டாவிற்கு ஒரு திருப்புமுனை ஆண்டாக அமையும் என அந்நிறுவனம் நம்புகிறது. இந்த ஏஐ வசதிகளை ஸ்மார்ட் கிளாஸ் போன்ற சாதனங்களில் புகுத்தி, மக்களின் அன்றாட வாழ்க்கையை எளிதாக்க மெட்டா திட்டமிட்டுள்ளது. வெறும் மென்பொருளாக மட்டுமல்லாமல், தனிப்பட்ட உதவியாளராகவும் இந்தத் தொழில்நுட்பம் செயல்படும். இதன் மூலம் ஏஐ சந்தையில் மெட்டா தனது ஆதிக்கத்தை நிலைநாட்டத் தயாராகி வருகிறது.