திருவண்ணாமலை மாவட்டம் வந்தவாசியில், காதல் திருமணம் செய்துகொண்ட இளைஞர் ஒருவர் தற்கொலை செய்துகொண்ட சம்பவம் அப்பகுதியில் பெரும் சோகத்தை ஏற்படுத்தியுள்ளது. வந்தவாசி சவேரியார்பாளையத்தைச் சேர்ந்த மோகன்ராஜ் (22) என்ற இளைஞர், ராணிப்பேட்டையைச் சேர்ந்த இளம்பெண் ஒருவரை காதலித்து கடந்த மாதம் தான் மணம் முடித்துள்ளார். திருமணத்திற்குப் பிறகு வந்தவாசியில் வாடகை வீட்டில் தங்கி இவர்கள் குடும்பம் நடத்தி வந்த நிலையில், இந்த துரதிர்ஷ்டவசமான சம்பவம் நிகழ்ந்துள்ளது.
சம்பவத்தன்று மோகன்ராஜ் தனது நண்பர்களைப் பார்க்கச் செல்வதாக மனைவியிடம் கூறியுள்ளார். ஆனால், அவரது மனைவி அதற்கு அனுமதி மறுத்துக் கண்டித்ததாகச் சொல்லப்படுகிறது. இதனால் மனமுடைந்த மோகன்ராஜ், வீட்டின் அறைக்குள் சென்று தூக்கிட்டுத் தற்கொலை செய்துகொண்டார். இது குறித்து தகவல் அறிந்த வந்தவாசி தெற்கு போலீசார், மோகன்ராஜின் உடலைக் கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். மேலும், இது தொடர்பாக வழக்குப் பதிவு செய்து தீவிர விசாரணை மேற்கொண்டு வருகின்றனர்.