உலகப் புகழ்பெற்ற தொழிலதிபர் முகேஷ் அம்பானியின் பிரம்மாண்டமான ‘அன்டிலியா’ இல்லம் குறித்துப் பல சுவாரசியமான தகவல்கள் அவ்வப்போது வெளியாகி மக்களை வியப்பில் ஆழ்த்தும். அந்த வகையில், தற்போது இந்த வீட்டின் மாதாந்திர மின்சாரக் கட்டணம் குறித்த தகவல் வெளியாகி அனைவரையும் அதிர்ச்சியில் ஆழ்த்தியுள்ளது. மும்பையில் அமைந்துள்ள இந்த 27 அடுக்கு மாடி குடியிருப்பில், ஒரு மாதத்திற்குச் சுமார் 6,37,260 யூனிட் மின்சாரம் பயன்படுத்தப்படுவதாகக் கூறப்படுகிறது.
இந்த அதீத மின் பயன்பாட்டிற்கு அந்த வீட்டில் உள்ள சொகுசு வசதிகளே முக்கியக் காரணமாகும். சுமார் 1500 கோடி ரூபாய் மதிப்பில் கட்டப்பட்டுள்ள இந்த இல்லத்தில் ஜிம், நீச்சல் குளம், திரையரங்கம், தோட்டம் மற்றும் 150-க்கும் மேற்பட்ட கார்களை நிறுத்தும் வசதி எனப் பல்வேறு சிறப்பம்சங்கள் உள்ளன. மேலும், இந்த வீட்டைப் பராமரிப்பதற்காக 24 மணி நேரமும் நூற்றுக்கணக்கான ஊழியர்கள் பணியாற்றி வருகின்றனர். இந்த வசதிகளைத் தடையின்றி இயக்குவதற்கு பெருமளவு மின்சாரம் செலவிடப்படுகிறது.
இதன் விளைவாக, அம்பானி குடும்பத்தினர் ஒரு மாதத்திற்குச் சுமார் 70 லட்சம் முதல் 80 லட்சம் ரூபாய் வரை மின்சாரக் கட்டணமாகச் செலுத்துவதாகத் தகவல் வெளியாகியுள்ளது. ஒரு நடுத்தர வர்க்கக் குடும்பத்தின் பல ஆண்டுகாலச் சம்பளத்தை, அம்பானி குடும்பம் ஒரே மாதத்தில் மின்சாரக் கட்டணமாகச் செலுத்துவது சமூக வலைதளங்களில் பெரும் விவாதத்தை ஏற்படுத்தியுள்ளது. இந்தியாவின் மிக விலையுயர்ந்த மற்றும் நவீன வசதிகள் கொண்ட வீடாக அன்டிலியா இன்றும் திகழ்ந்து வருகிறது.