சென்னையில் சக செவிலியருக்குக் காளான் சூப்பில் தூக்க மாத்திரை கலந்து கொடுத்து, 6 சவரன் தங்கச் சங்கிலியைத் திருடிய செவிலியர் கைது செய்யப்பட்ட சம்பவம் பெரும் பரபரப்பை ஏற்படுத்தியுள்ளது. எழும்பூர் அரசு குழந்தைகள் நல மருத்துவமனையில் பணியாற்றும் ஆதம்பாக்கத்தைச் சேர்ந்த சுனிதா என்பவர், தனது சக ஊழியரான நான்சி நிஷா என்பவரின் வீட்டிற்குச் சென்றுள்ளார். அப்போது நான்சி நிஷா உபசரிப்பாக வழங்கிய காளான் சூப்பை அருந்திய சுனிதா, சிறிது நேரத்தில் மயக்கமடைந்தார். இந்தச் சூழலைப் பயன்படுத்திக் கொண்ட நான்சி நிஷா, சுனிதா அணிந்திருந்த விலையுயர்ந்த தங்கச் சங்கிலியைத் திருடியுள்ளார்.
மயக்கம் தெளிந்து வீட்டிற்குச் சென்ற பின்னரே தனது நகை காணாமல் போனதை உணர்ந்த சுனிதா, இது குறித்துக் காவல்துறையில் புகார் அளித்தார். போலீசாரின் தீவிர விசாரணையில், நான்சி நிஷா திட்டமிட்டு சூப்பில் மயக்க மருந்து கலந்து நகையைத் திருடியது உறுதி செய்யப்பட்டது. இதனையடுத்து அவரைக் கைது செய்த போலீசார், திருடப்பட்ட நகையை மீட்டனர். விசாரணையில், நான்சி நிஷா ஏற்கனவே மற்றொரு செவிலியரிடமும் இதேபோன்று கைவரிசை காட்டி கடந்த வாரம்தான் ஜாமீனில் வெளியே வந்தவர் என்ற அதிர்ச்சித் தகவல் வெளியாகியுள்ளது. நம்பிக்கைக்குரிய சக ஊழியரே இத்தகைய குற்றச்செயலில் ஈடுபட்டது மருத்துவ வட்டாரத்தில் அதிர்ச்சியை ஏற்படுத்தியுள்ளது.