மலேசியாவில் இன்று நடைபெற்று வரும் ‘ஜனநாயகன்’ பட இசை வெளியீட்டு விழாவில், மலேசிய காவல்துறையின் தடையை மீறி தமிழக வெற்றிக் கழகத்தின் (தவெக) கொடியை ஏந்திய ரசிகர் அதிரடியாகக் கைது செய்யப்பட்டுள்ளார். பொழுதுபோக்கு நிகழ்ச்சிகளில் அரசியல் சின்னங்கள், கொடிகள் அல்லது கட்சி சார்ந்த முழக்கங்களுக்கு அந்நாட்டு அரசு ஏற்கனவே கடும் நிபந்தனைகளை விதித்திருந்தது. இந்த எச்சரிக்கையையும் பொருட்படுத்தாமல், அரங்கில் கொடியை அசைத்து விதிமுறைகளை மீறியதற்காக அந்த ரசிகர் மீது இந்தச் சட்ட நடவடிக்கை எடுக்கப்பட்டுள்ளது.
விழாவின் போது ஆயிரக்கணக்கான ரசிகர்கள் “TVK… TVK…” என முழக்கமிட்டதால் பெரும் பரபரப்பு ஏற்பட்டது. நிலைமை விபரீதமாவதை உணர்ந்த நடிகர் விஜய், மேடையிலிருந்தே கைகளை அசைத்து ரசிகர்களை அமைதிப்படுத்த முயன்றார். இருப்பினும், காவல்துறையின் நேரடி கண்காணிப்பில் இருந்த இந்த நிகழ்வில், அரசியல் அடையாளத்தைப் பயன்படுத்தியதற்காக எடுக்கப்பட்ட இந்த அதிரடி கைது நடவடிக்கை, நிகழ்ச்சி ஏற்பாட்டாளர்கள் மற்றும் ரசிகர்கள் மத்தியில் அதிர்ச்சியை ஏற்படுத்தியுள்ளது.