தமிழக வெற்றிக் கழகத்தின் மாவட்ட நிர்வாகிகளைத் தேர்வு செய்யும் பணிகள் தீவிரமாக நடைபெற்று வரும் வேளையில், திருச்சி மாவட்ட நிர்வாகி ஒருவரின் பெயர் அடிபடுவது கட்சிக்குள் பெரும் புயலைக் கிளப்பியுள்ளது. திருச்சி மாவட்டம் திருவெறும்பூர் தொகுதியில் தாலுகா அளவிலான பொறுப்புகளைப் பெறுவதற்கு விரும்புபவர்களிடம், நிர்வாகி அருள்ராஜ் என்பவர் சுமார் 10 கோடி ரூபாய் வரை பேரம் பேசியதாகப் பரபரப்பு புகார் எழுந்துள்ளது. இதனால், அருள்ராஜிற்கு மாவட்டப் பொறுப்பாளர் பதவி வழங்கக்கூடாது என வலியுறுத்தி திருச்சி மாவட்டத்தைச் சேர்ந்த தவெக நிர்வாகிகள் மற்றும் தொண்டர்கள் சென்னை பனையூரில் உள்ள தலைமை அலுவலகத்தை இன்று முற்றுகையிட்டனர்.
அலுவலகத்திற்குள் நுழைய முயன்ற தொண்டர்களைப் பாதுகாப்புப் பணியில் இருந்தவர்கள் தடுத்து நிறுத்தியதால் வாயிலிலேயே வாக்குவாதம் ஏற்பட்டது. ஏற்கனவே திருவள்ளூர் மாவட்ட நிர்வாகிகள் அதிருப்தி தெரிவித்துப் போராட்டம் நடத்திய நிலையில், தற்போது தூத்துக்குடி மற்றும் திருச்சி மாவட்ட நிர்வாகிகள் கட்சித் தலைமைக்கு எதிராகத் திரண்டுள்ளது பரபரப்பை ஏற்படுத்தியுள்ளது.
தகுதியானவர்களுக்குப் பதவி வழங்க வேண்டும் என்றும், பண பலம் கொண்டவர்களுக்கு முக்கியத்துவம் அளிக்கக்கூடாது என்றும் நிர்வாகிகள் கோரிக்கை விடுத்து வருகின்றனர். 2026 தேர்தலைச் சந்திக்கத் தயாராகி வரும் தவெக-வில், மாவட்ட அளவிலான இந்தப் பதவிப் போட்டிகள் கட்சித் தலைமைக்குச் சவாலாக உருவெடுத்துள்ளன. தமிழக வெற்றிக் கழகத்தின் அடுத்தகட்ட முடிவுகளைத் தொண்டர்கள் உன்னிப்பாகக் கவனித்து வருகின்றனர்.