தவெக தலைவர் விஜய் பங்கேற்கும் கொங்கு மண்டலத்தின் முதல் மக்கள் சந்திப்பு நிகழ்ச்சி நாளை ஈரோடு மாவட்டம் விஜயமங்கலம் அருகே உள்ள சுங்கச்சாவடி பகுதியில் நடைபெறுகிறது. நிகழ்ச்சிக்கான பாதுகாப்பு மற்றும் மேடைப் பணிகளை ஆய்வு செய்ய கட்சியின் பொதுச்செயலாளர் புஸ்ஸி ஆனந்த் மற்றும் நிர்வாகக் குழு ஒருங்கிணைப்பாளர் செங்கோட்டையன் ஆகியோர் இன்று விஜயமங்கலம் வந்தனர். அப்போது புஸ்ஸி ஆனந்துக்கு வரவேற்பு அளிப்பதில் ஈரோடு மற்றும் திருப்பூர் மாவட்டச் செயலாளர்களிடையே “யார் முதலில் மாலை அணிவிப்பது” என்ற போட்டியில் வாக்குவாதம் ஏற்பட்டு மோதலாக வெடித்தது. கரூரில் கடந்த செப்டம்பர் மாதம் நடைபெற்ற கூட்டத்தில் ஏற்பட்ட கூட்ட நெரிசலில் (41 பேர் உயிரிழந்தனர்) கசப்பான அனுபவத்தைத் தொடர்ந்து, ஈரோடு கூட்டத்திற்கு காவல்துறை 84 கடுமையான நிபந்தனைகளை விதித்துள்ளது.
