“காப்பாற்ற யாருமே இல்லை!”.. வாட்டர் பார்க்கில் பறிபோன 8 வயது சிறுவனின் உயிர்.. கதறும் பெற்றோர்.. பின்னணியில் இருக்கும் வாட்டர் பார்க் அலட்சியம்..!!

உத்தரப் பிரதேசத்தின் ஹாபூர் (Hapur) மாவட்டத்தில் உள்ள ஆலாப்பூர் பகுதியில் அமைந்துள்ள வாட்டர் பார்க் ஒன்றில், 8 வயது சிறுவன் ஒருவன் நீச்சல் குளத்தில் மூழ்கி பரிதாபமாக உயிரிழந்தான். அந்தச் சிறுவன் தனது மாமாவுடன் விடுமுறையைக் கொண்டாடுவதற்காக அந்த வாட்டர் பார்க்கிற்குச் சென்றுள்ளான். நீச்சல் குளத்தில் விளையாடிக் கொண்டிருந்தபோது எதிர்பாராதவிதமாக சிறுவன் தண்ணீரில் மூழ்கிய நிலையில், அவனை மீட்டு காப்பாற்ற எடுத்த முயற்சிகள் தோல்வியடைந்து பரிதாபமாக உயிரிழந்தான்.

இந்த விபத்து நடந்த வாட்டர் பார்க்கில் எவ்வித அடிப்படை பாதுகாப்பு வழிமுறைகளோ அல்லது அவசர கால உயிர் காப்பாளர்களோ (Lifeguards) நியமிக்கப்படவில்லை என்று குற்றம் சாட்டப்பட்டுள்ளது. சிறுவன் உயிரிழந்த அதிர்ச்சியூட்டும் சம்பவத்தைத் தொடர்ந்து, சட்ட நடவடிக்கைக்குப் பயந்த அந்த நீச்சல் குளத்தின் உரிமையாளர் வாட்டர் பார்க்கை உடனடியாகப் பூட்டிவிட்டு அங்கிருந்து தலைமறைவாகியுள்ளார். இச்சம்பவம் குறித்து போலீசாருக்குத் தகவல் தெரிவிக்கப்பட்டுள்ள நிலையில், அவர்கள் வழக்குப் பதிவு செய்து தப்பியோடிய உரிமையாளரைத் தீவிரமாகத் தேடி வருகின்றனர்.