BREAKING: சுங்கச்சாவடியில் திடீரென சரணடைந்த 7 பேர்… சேலம் ரவுடி ஜங்ஷன் டேவிட்டின் கதையை முடித்த மினிட்-டு-மினிட் ஷாக்…. அதிரடி திருப்பம்….!

சேலத்தில் பிரபல ரவுடி ஜங்ஷன் டேவிட் படுகொலை செய்யப்பட்ட சம்பவத்தில், கொலையாளிகளான 7 பேர் காவல்துறையினரிடம் சரணடைந்துள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளது. சேலம் மாவட்டம் ஜாகிர் அம்மாபாளையத்தைச் சேர்ந்த ஜங்ஷன் டேவிட் (எ) உதயகுமார் (41) என்பவர் மீது கொலை, நில மோசடி உள்ளிட்ட பல்வேறு வழக்குகள் நிலுவையில் உள்ளன. நில மோசடி வழக்கு ஒன்றில் கைதாகிச் சிறையிலிருந்த இவர், சென்னை உயர் நீதிமன்றத்தின் நிபந்தனை ஜாமீனில் வெளிவந்து, தினமும் காவல் நிலையத்தில் கையெழுத்திட்டு வந்துள்ளார்.

நேற்று காலை மத்திய குற்றப்பிரிவு காவல் நிலையத்தில் கையெழுத்திட்டுவிட்டு, இரும்பாலை சாலை புது ரோடு மேம்பாலத்தில் இருசக்கர வாகனத்தில் அவர் சென்றுகொண்டிருந்தார். அப்போது, மூன்று இருசக்கர வாகனங்களில் பின்தொடர்ந்து வந்த 5-க்கும் மேற்பட்ட நபர்கள் கொண்ட மர்மக் கும்பல், ஜங்ஷன் டேவிட்டை வழிமறித்து அரிவாளால் வெட்டத் தொடங்கியது. அவர்களிடம் இருந்து தப்பிக்க வாகனத்தை விட்டு இறங்கி, மேம்பாலச் சுவரில் ஏறி கீழே குதித்த டேவிட், நிலைதடுமாறி அருகிலிருந்த கற்கள் மீது விழுந்தார்.

அவரைப் பின்தொடர்ந்து ஓடிவந்த அந்தக் கும்பல், தங்கள் கையில் வைத்திருந்த பயங்கர ஆயுதங்களால் டேவிட்டை சரமாரியாக வெட்டியது. இதில் பலத்த காயமடைந்த ஜங்ஷன் டேவிட் சம்பவ இடத்திலேயே பரிதாபமாக உயிரிழந்தார். தகவல் அறிந்து சம்பவ இடத்திற்கு விரைந்து வந்த சூரமங்கலம் காவல்துறையினர், டேவிட்டின் உடலைக் கைப்பற்றிப் பிரேதப் பரிசோதனைக்காக அனுப்பி வைத்தனர். மக்கள் நடமாட்டம் மிகுந்த பகுதியில் நடந்த இந்தத் துணிச்சலான கொலைச் சம்பவம் சேலம் மாநகர மக்களிடையே அதிர்ச்சியை ஏற்படுத்தியது.

இக்கொலை குறித்து சேலம் மாநகரக் காவல் ஆணையர் பாபு உத்தரவின் பேரில் 3 தனிப்படைகள் அமைக்கப்பட்டுத் தீவிரத் தேடுதல் வேட்டை நடத்தப்பட்டது. இந்நிலையில், இக்கொலை வழக்கில் தொடர்புடைய ராஜன், கார்த்திக், சுலைமான், மோகன், ரகு, அருண்குமார் மற்றும் மணிகண்டன் ஆகிய 7 பேர் சேலம் கருப்பூர் சுங்கச்சாவடி பகுதியில் காவல்துறையினரிடம் சரணடைந்தனர். அவர்களிடம் உயர் காவல் அதிகாரிகள் கொலைக்கான பின்னணி மற்றும் காரணம் குறித்துத் தீவிர விசாரணை நடத்தி வருகின்றனர்.