தமிழக அரசியலில் தேர்தல் களம் சூடுபிடித்துள்ள நிலையில், கூட்டணி குறித்த தனது நிலைப்பாட்டை புதிய தமிழகம் கட்சியின் தலைவர் டாக்டர் கிருஷ்ணசாமி தெளிவுபடுத்தியுள்ளார். சென்னையில் செய்தியாளர்களைச் சந்தித்த அவர், வரும் பிப்ரவரி 14-ஆம் தேதிக்குள் கூட்டணி குறித்த இறுதி முடிவை முறைப்படி அறிவிக்க உள்ளதாகத் தெரிவித்தார். தமிழகத்தில் ஒரு நல்லாட்சியை உருவாக்க வேண்டும் என்பதே தனது கட்சியின் நோக்கம் என்றும் அவர் இதன்போது வலியுறுத்தினார்.
தங்களது கட்சியின் பலம் குறித்துப் பேசிய கிருஷ்ணசாமி, புதிய தமிழகம் கட்சி அங்கம் வகிக்கும் கூட்டணி குறைந்தது 60 முதல் 70 தொகுதிகள் வரை வெற்றி பெறுவதற்கு வாய்ப்புள்ளதாகக் குறிப்பிட்டார். தனித் தொகுதிகளைக் காட்டிலும் பொதுத் தொகுதிகளில் தங்களுக்கு அதிக வாக்கு வங்கி இருப்பதாகவும், அந்த வாக்குகள் வெற்றி-தோல்வியைத் தீர்மானிப்பதில் முக்கியப் பங்கு வகிக்கும் என்றும் அவர் தன்னம்பிக்கையுடன் தெரிவித்தார்.
விஜய்யின் தமிழக வெற்றி கழகம் உள்ளிட்ட பிற கட்சிகளுடன் கூட்டணி அமைப்பது குறித்த கேள்விக்கு, தாங்கள் யாருக்காகவும் கதவுகளை மூடவில்லை என்று பதிலளித்தார். “கதவுகளைத் திறந்துதான் வைத்திருக்கிறோம்; நல்ல காற்று வந்தால் வரவேற்போம், மோசமான காற்று வந்தால் கதவை மூடிவிடுவோம்” என்று உருவகமாகப் பேசிய அவர், தற்போதைக்கு அனைத்து வாய்ப்புகளும் திறந்தே இருப்பதைச் சுட்டிக்காட்டினார்.
அரசியல் பேச்சுகளுக்கு இடையே, மாஞ்சோலை தேயிலைத் தோட்டத் தொழிலாளர்களின் வாழ்வாதாரப் பிரச்சினைகள் குறித்தும் அவர் கவலை தெரிவித்தார். நீதிமன்ற உத்தரவு இருந்தபோதிலும், அங்கு மின்சாரம் மற்றும் அத்தியாவசிய சேவைகள் துண்டிக்கப்படுவது மனித உரிமை மீறல் என்று சாடிய அவர், மாவட்ட நிர்வாகத்தின் இத்தகைய போக்கிற்கு எதிராக சட்ட ரீதியான நடவடிக்கைகள் எடுக்கப்படும் என்றும் எச்சரித்தார்.