தாராபுரம் மற்றும் மதுராந்தகம் இடைத்தேர்தல் வெற்றி தமிழக அரசியலில் புதியதொரு மாற்றத்திற்கு வித்திட்டுள்ளது. இத்தேர்தலில் மதுராந்தகம் தொகுதியில் தவெக வேட்பாளர் மரகதம் குமரவேல் மற்றும் தாராபுரத்தில் சத்யபாமா ஆகியோர் திமுக, அதிமுக வேட்பாளர்களை வீழ்த்தி அபார வெற்றி பெற்றுள்ளனர். எந்தவித பண பலமும், லஞ்ச லாவண்யமுமின்றி, மக்களின் தூய அன்பையும் நம்பிக்கையையும் மட்டுமே நம்பி தவெக இந்த வெற்றியைப் ஈட்டியுள்ளதாக அக்கட்சியினர் பெருமிதம் தெரிவித்துள்ளனர்.
சென்னையில் செய்தியாளர்களைச் சந்தித்துப் பேசிய தவெக தேர்தல் மேலாண்மை பிரிவு பொதுச் செயலாளர் ஆதவ் அர்ஜுனா, எதிர்க்கட்சிகளின் அனைத்து வியூகங்களையும் தடுத்து நிறுத்தி மக்கள் தவெகவை ஏற்றுக்கொண்டுள்ளதாகத் தெரிவித்தார். எடப்பாடி பழனிசாமியின் தவறான தலைமையால் அதிமுகவின் வாக்கு வங்கி பெருமளவு சரிந்துள்ளதாகவும், இரட்டை இலைச் சின்னத்தின் பலம் இல்லையென்றால் அக்கட்சியால் ஒரு ஓட்டு கூட வாங்க முடியாது நிலை ஏற்பட்டுள்ளதாகவும் அவர் விமர்சித்தார்.
அதிமுகவின் பலவீனம் மற்றும் எடப்பாடி பழனிசாமியின் மீதுள்ள அதிருப்தி காரணமாக, எம்.ஜி.ஆர் மற்றும் ஜெயலலிதாவின் உண்மையான விசுவாசிகள் தவெகவை நோக்கி நகரத் தொடங்கியுள்ளனர். கடந்த சில நாட்களாக 70 சதவீதத்திற்கும் அதிகமான அதிமுக ஒன்றியச் செயலாளர்கள் தங்களைத் தொடர்பு கொண்டு பேசி வருவதாகக் குறிப்பிட்ட ஆதவ் அர்ஜுனா, தொண்டர்கள் அனைவரும் விஜய்யை எம்.ஜி.ஆரின் மறுவடிவமாகப் பார்ப்பதாகக் கூறினார்.
திமுக மற்றும் அதிமுகவின் மறைமுகக் கூட்டு அரசியலை அம்பலப்படுத்தியுள்ள தவெக, தமிழகத்தில் மாற்று அரசியல் சக்தியாக அசுர வளர்ச்சி கண்டு வருகிறது. பணம் மற்றும் ஜாதி அரசியலுக்கு இடமளிக்காமல் மக்கள் நலனை மட்டுமே முன்னிறுத்தும் தவெகவின் எழுச்சி, 2026 சட்டமன்றத் தேர்தலில் தமிழகத்தில் ஒரு புதிய வரலாற்றுச் சாதனையைப் படைக்கும் என்ற எதிர்பார்ப்பை பொதுமக்களிடையே ஏற்படுத்தியுள்ளது.
