குடிசை வீடுகளுக்கு விடை… கலைஞர் கனவு இல்லம் திட்டத்தில் இவ்வளவு நன்மைகளா?… அதிரடி சலுகை..!!!

தமிழக அரசின் ‘கலைஞர் கனவு இல்லம்’ திட்டம், கிராமப்புறங்களில் வசிக்கும் ஏழை எளிய மக்களின் சொந்த வீட்டு கனவை நனவாக்கும் ஒரு மகத்தான முயற்சியாக உருவெடுத்துள்ளது. இத்திட்டத்தின் கீழ், 2030-ஆம் ஆண்டுக்குள் ஊரகப் பகுதிகளில் 5 லட்சம் மற்றும் நகர்ப்புறங்களில் 2 லட்சம் என மொத்தம் 7 லட்சம் கான்கிரீட் வீடுகளைக் கட்டித் தர முதல்வர் மு.க.ஸ்டாலின் இலக்கு நிர்ணயித்துள்ளார்.

மேலும் தற்போது முதற்கட்டமாக ஒரு லட்சம் வீடுகள் கட்ட 3,500 கோடி ரூபாய் நிதி ஒதுக்கப்பட்டு பணிகள் துரிதப்படுத்தப்பட்டுள்ளன. பாதுகாப்பான உறைவிடம் இல்லாத விளிம்புநிலை மக்கள், குறைந்தபட்சம் 360 சதுர அடி நிலம் வைத்திருப்பவர்கள் இத்திட்டத்தின் கீழ் பயன்பெறலாம். ஒரு வீடு கட்டுவதற்கு அரசு தரப்பில் 3.50 லட்சம் ரூபாய் மானியம் வழங்கப்படுவதுடன், கூடுதல் தேவைக்காக வங்கிக் கடன் வசதியும், குறைந்த விலையில் சிமெண்ட் மற்றும் இரும்பு போன்ற கட்டுமானப் பொருட்களும் வழங்கப்படுவது பயனாளிகளுக்கு பெரும் வரப்பிரசாதமாகும்.

இந்தத் திட்டமானது இடைத்தரகர்கள் தலையீடு இன்றி, கட்டுமானப் பணிகளின் முன்னேற்றத்திற்கு ஏற்ப மூன்று தவணைகளாகப் பயனாளிகளின் வங்கிக் கணக்கிலேயே நேரடியாக நிதி செலுத்தப்படுவதை உறுதி செய்கிறது. விண்ணப்பதாரர்கள் தமிழ்நாட்டைப் பூர்வீகமாகக் கொண்டவராகவும், சொந்தமாக கான்கிரீட் வீடு இல்லாதவராகவும் இருக்க வேண்டும் என்பது கட்டாயமாகும்.

இந்நிலையில் ஊராட்சி மன்றத் தலைவர் தலைமையிலான குழுவினர் விண்ணப்பங்களை ஆய்வு செய்து, கிராம சபையின் ஒப்புதலோடு பயனாளிகளைத் தேர்வு செய்யும் வெளிப்படையான நடைமுறை பின்பற்றப்படுகிறது. தமிழகத்தின் குக்கிராமங்களில் உள்ள குடிசை வீடுகளை மாற்றி, நவீன வசதிகளுடன் கூடிய கான்கிரீட் வீடுகளாக உருமாற்றும் இந்த ‘கலைஞர் கனவு இல்லம்’ திட்டம், தமிழக மக்களின் வாழ்வாதாரத்தை மேம்படுத்துவதில் ஒரு மைல்கல்லாக அமையும் என்பதில் ஐயமில்லை.