“அவள் நேசித்த பணியிலேயே உயிர் பிரிந்தது” ஒரு வாரத்திற்கு முன் பணியில் சேர்ந்த வீரர் பலி… ஈராக் மண்ணில் வீழ்ந்த 6 அமெரிக்கச் சிங்கங்கள்..!

ஈராக்கில் நடந்த அமெரிக்க எரிபொருள் நிரப்பும் விமான விபத்தில் உயிரிழந்த ஆறு வீரர்களின் அடையாளங்களை பென்டகன் அதிகாரப்பூர்வமாக வெளியிட்டுள்ளது. மேற்கு ஈராக் பகுதியில் KC-135 ரக விமானம் விபத்துக்குள்ளானதில், அலபாமாவைச் சேர்ந்த ஜான் “அலெக்ஸ்” கிளின்னர் (33), வாஷிங்டனைச் சேர்ந்த அரியானா சவினோ (31), கென்டக்கியைச் சேர்ந்த ஆஷ்லே ப்ரூட் (34), இண்டியானாவைச் சேர்ந்த சேத் கோவல் (38), ஓஹியோவைச் சேர்ந்த கர்டிஸ் ஆங்ஸ்ட் (30) மற்றும் டைலர் சிம்மன்ஸ் (28) ஆகியோர் உயிரிழந்தனர். இந்த விபத்து எதிரிகளின் தாக்குதலாலோ அல்லது தவறுதலான துப்பாக்கிச் சூட்டாலோ (Friendly fire) நடைபெறவில்லை என்று அமெரிக்க அதிகாரிகள் தெளிவுபடுத்தியுள்ளனர்.

பலியானவர்களில் அரியானா சவினோ, 99-வது விமான எரிபொருள் நிரப்பும் படையில் கேப்டனாகவும், செயல்பாட்டு விமானிகளின் தலைவராகவும் பணியாற்றி வந்தார். சுமார் 21 மில்லியன் டாலர் மதிப்பிலான பறக்கும் திட்டங்களுக்குப் பொறுப்பு வகித்த அவர், ஒரு சிறந்த வழிகாட்டியாகவும் “விமானப்படை சூப்பர் ஸ்டார்” என்றும் சக வீரர்களால் போற்றப்பட்டார். “தான் நேசித்த பணியைச் செய்யும் போதே அவர் உயிர் பிரிந்தது” என்று அவரது நண்பர்கள் உருக்கத்துடன் தெரிவித்துள்ளனர். அவர் சென்ற இடமெல்லாம் மகிழ்ச்சியைப் பரப்பக்கூடியவர் என்றும், சுற்றியிருப்பவர்களைச் சிறந்தவர்களாக மாற்றும் குணம் கொண்டவர் என்றும் புகழாரம் சூட்டப்பட்டுள்ளது.

மற்றொரு விமானியான ஜான் “அலெக்ஸ்” கிளின்னர், இந்த விபத்து நடப்பதற்கு ஒரு வாரத்திற்கு முன்புதான் பணியில் சேர்ந்திருந்தார். கடந்த ஜனவரி மாதம் மேஜராகப் பதவி உயர்வு பெற்றிருந்த அவருக்கு, இரண்டு வயது மகன் மற்றும் ஏழு மாத இரட்டைக் குழந்தைகள் என மூன்று சிறு குழந்தைகள் உள்ளனர். உயிரிழந்தவர்களில் கிளின்னர், சவினோ மற்றும் ப்ரூட் ஆகியோர் விமானப்படை உறுப்பினர்களாகவும், மற்ற மூவர் தேசிய காவல்படையைச் சேர்ந்தவர்களாகவும் இருந்தனர். இந்தத் துயரச் சம்பவம் அமெரிக்க ராணுவ வட்டாரத்தில் பெரும் சோகத்தை ஏற்படுத்தியுள்ளது.