500 கிலோ மட்டன் கறிவிருந்து… திரண்ட 5000 மக்கள்… சிவகங்கையில் அரங்கேறிய சம்பவம்… அந்த விஷயம் என்ன தெரியுமா?…

சிவகங்கை மாவட்டம் திருப்பத்தூர் அருகே அமைந்துள்ள பூலாம்பட்டி கிராமம், மத நல்லிணக்கத்திற்குச் சிறந்த சான்றாகத் திகழ்கிறது. இங்குள்ள இந்துக்கள், கிறிஸ்தவர்கள் மற்றும் முஸ்லிம்கள் ஆகிய அனைவரும் இணைந்து 100 ஆண்டுகளுக்கும் மேலாகப் பாரம்பரியக் கறி விருந்து விழாவை விமரிசையாகக் கொண்டாடி வருகின்றனர். இந்த ஆண்டு நடைபெற்ற விருந்தில் பூலாம்பட்டி மற்றும் சுற்றுவட்டார கிராமங்களைச் சேர்ந்த 5 ஆயிரத்துக்கும் மேற்பட்ட மக்கள் தங்கள் குடும்பத்தினருடன் கலந்துகொண்டு ஒரே இடத்தில் அமர்ந்து உணவருந்தினர்.

இந்த விழாவின் மிக முக்கிய நெகிழ்ச்சியான நிகழ்வாக, இந்துக்களும் கிறிஸ்தவர்களும் சர்க்கரை, பேரிச்சம்பழம், மல்லிகைப்பூ மற்றும் ஊதுபத்தி போன்ற பொருட்களைச் சீர்வரிசையாகக் கொண்டு வந்து பள்ளிவாசலில் வழங்கி வழிபாடு நடத்தினர். பின்னர் அப்பொருட்கள் பொதுமக்களுக்குப் பிரசாதமாக விநியோகிக்கப்பட்டன. முதல் நாள் பள்ளிவாசலில் விருந்து உபசரிப்பு முடிந்ததைத் தொடர்ந்து, அடுத்ததாகக் கிராமத்தில் உள்ள அம்மன் கோயிலிலும் அனைத்து மதத்தினரும் ஒன்றிணைந்து சந்தன காப்பு அலங்காரம் உள்ளிட்ட வழிபாட்டு நிகழ்வுகளில் பங்கேற்றனர்.

மதங்கள் வெவ்வேறாக இருந்தாலும் மனங்கள் ஒன்றாக இணைந்து வாழும் பூலாம்பட்டி மக்களின் இந்தத் தலைமுறை தலைமுறையான ஒற்றுமை பெரும் பாராட்டைப் பெற்றுள்ளது. விழாவில் கலந்துகொண்ட கிராம மக்கள் நெகிழ்ச்சியுடன் இவ்ஒற்றுமையைப் போற்றிய நிலையில், தற்போது இந்த மத நல்லிணக்க விழாவின் புகைப்படங்களும் காணொளிகளும் இணையதளங்களில் பரவி நெட்டிசன்களின் வாழ்த்துகளையும் பாராட்டுகளையும் குவித்து வருகின்றன.