பகீர்..! ஒரே நாளில் 400 பேர் மரணம்… நோயாளிகள் மீது வான்வழித் தாக்குதல்… பாகிஸ்தானின் எல்லைமீறும் அட்டூழியம்..!!

காபூலில் உள்ள ஒரு போதைப்பொருள் மறுவாழ்வு மையத்தின் மீது பாகிஸ்தான் படைகள் நடத்திய வான்வழித் தாக்குதலில் 400-க்கும் மேற்பட்டோர் உயிரிழந்திருப்பதாகவும், சுமார் 250 பேர் காயமடைந்திருப்பதாகவும் தலிபான் செய்தித் தொடர்பாளர் ஜபிஹுல்லா முஜாஹித் தெரிவித்துள்ளார். இந்தத் தாக்குதலில் மருத்துவமனையின் பெரும் பகுதி தரைமட்டமாக்கப்பட்டுள்ள நிலையில், உயிரிழப்புகளின் எண்ணிக்கை மேலும் அதிகரிக்கக்கூடும் என அஞ்சப்படுகிறது. எல்லையில் இரு நாடுகளுக்கும் இடையே நீடித்து வரும் துப்பாக்கிச் சூடு சம்பவங்களுக்கு மத்தியில், இந்த வான்வழித் தாக்குதல் நடத்தப்பட்டுள்ளது.

பாகிஸ்தான் ராணுவம் ஆப்கானிஸ்தானின் வான்வெளியை அத்துமீறி நுழைந்து, சிகிச்சை பெற்று வந்த நோயாளிகளைக் குறிவைத்துத் தாக்கியுள்ளதாகத் தலிபான் தரப்பு குற்றம் சாட்டியுள்ளது. இது சர்வதேசக் கொள்கைகளுக்கு எதிரானது என்றும், மனிதகுலத்திற்கு எதிரான கொடூரமான குற்றம் என்றும் அவர்கள் வன்மையாகக் கண்டித்துள்ளனர். இரு அண்டை நாடுகளுக்கும் இடையே கடந்த மூன்று வாரங்களாக நடைபெற்று வரும் மிக மோசமான மோதல்களின் ஒரு பகுதியாகவே இந்தச் சம்பவம் பார்க்கப்படுகிறது.

மறுபுறம், ஆப்கானிஸ்தான் முன்வைத்துள்ள இந்தக் குற்றச்சாட்டுகளைப் பாகிஸ்தான் அரசு திட்டவட்டமாக மறுத்துள்ளது. காபூலில் எந்தவொரு மருத்துவமனையையும் தாங்கள் குறிவைக்கவில்லை என்றும், இத்தகைய புகார்கள் முற்றிலும் ஆதாரமற்றவை என்றும் பாகிஸ்தான் தரப்பில் விளக்கம் அளிக்கப்பட்டுள்ளது. இருப்பினும், எல்லையில் நிலவும் பதற்றமான சூழலால் இரு நாடுகளுக்கும் இடையிலான உறவு மேலும் சிக்கலாகியுள்ளது.