“மாமா என்று கூப்பிட்ட குழந்தைக்கு நேர்ந்த துரோகம்”.. 6 வயது சிறுமியிடம் அத்துமீறிய 40 வயது ஓட்டுநர்.. பூந்தமல்லி சுடுகாட்டில் நடந்த பகீர் சம்பவம்..!!

திருவள்ளூர் மாவட்டம் பூந்தமல்லி அடுத்த காட்டுப்பாக்கம், கன்னிகாபுரம் பகுதியைச் சேர்ந்த 40 வயதுடைய சரவணன் என்பவர் ஓட்டுநராக வேலை செய்து வந்துள்ளார். இவர் தனது வீட்டின் அருகே விளையாடிக் கொண்டிருந்த அதே பகுதியைச் சேர்ந்த 6 வயது சிறுமியை, அருகில் இருந்த சுடுகாட்டுப் பகுதிக்கு அழைத்துச் சென்று பாலியல் சீண்டலில் ஈடுபட்டுள்ளார். அந்தச் சிறுமிக்கு சரவணன் ஏற்கனவே பழக்கமானவர் என்பதோடு, அவரை மாமா என்று உரிமையோடு அழைத்து வந்துள்ளார். தான் மிகவும் நம்பிய நபர் தன்னிடம் தவறாக நடந்துகொண்டதால் அதிர்ச்சியடைந்த அந்தச் சிறுமி, செய்வதறியாது சுடுகாட்டில் இருந்து அழுதபடியே தப்பி ஓடி வந்துள்ளார்.

நடந்த சம்பவத்தைக் கேட்டு அதிர்ச்சியடைந்த சிறுமியின் பெற்றோர், பூந்தமல்லி அனைத்து மகளிர் காவல் நிலையத்தில் உடனடியாகப் புகார் அளித்தனர். இச்சம்பவம் குறித்து குழந்தைகள் நல வாரிய அதிகாரிகளும் நேரில் சென்று தீவிர விசாரணை மேற்கொண்டனர். இவ்விசாரணையில், சிறுமி சரவணனை மாமா என்று அழைத்ததைத் தனக்குச் சாதகமாகப் பயன்படுத்திக் கொண்டு அவர் பாலியல் அத்துமீறலில் ஈடுபட்டது உறுதி செய்யப்பட்டது. இதனைத் தொடர்ந்து, பூந்தமல்லி அனைத்து மகளிர் போலீசார் சரவணன் மீது போக்சா சட்டப் பிரிவின் கீழ் வழக்குப் பதிவு செய்து அவரைக் கைது செய்து சிறையில் அடைத்தனர். இச்சம்பவம் அப்பகுதி மக்களிடையே பெரும் அதிர்ச்சியையும் சோகத்தையும் ஏற்படுத்தியுள்ளது.