“விஜய் கொடுத்த ஷாக்… 2029-ஐ குறிவைக்கும் மாஸ்டர் பிளான்”… கலக்கத்தில் திமுக… பாஜகவுடன் ரகசியக் கூட்டணிக்குக் காய் நகர்த்தும் தலைமை?…. பரபரப்பு தகவல்…!

தமிழ்நாட்டில் அரசியல் களம் சூடுபிடித்துள்ள நிலையில், திமுக மற்றும் தவெக இடையேயான மோதல் புதிய கட்டத்தை எட்டியுள்ளது. முதல்வர் விஜய் தலைமையிலான அரசு, திமுக மீதான தொடர்ச்சியான ஊழல் புகார்கள் மற்றும் கைது நடவடிக்கைகளால் அரசியல் நெருக்கடியை தீவிரப்படுத்தியுள்ளது. முன்னாள் அமைச்சர்கள் மீதான சோதனைகள் மற்றும் அன்பில் மகேஷின் கைது போன்றவை திமுக தலைமைக்கு பெரும் கொந்தளிப்பை ஏற்படுத்தியுள்ளன.

இந்த நெருக்கடியான சூழலை எதிர்கொள்ள மு.க.ஸ்டாலின் தனது முக்கிய தளபதிகளுடன் அவசர ஆலோசனைகளை நடத்தியுள்ளார். தமிழ்நாட்டில் ஆட்சியை இழந்துள்ள நிலையில், மத்தியில் ஆளும் தேசிய ஜனநாயகக் கூட்டணியுடன் கைகோர்த்து மத்திய அமைச்சரவையில் இடம்பெற்றால் மட்டுமே தவெக அரசின் நடவடிக்கைகளைத் தடுத்து நிறுத்த முடியும் என்ற கோணம் ஆலோசனையில் எழுந்துள்ளது.

இருப்பினும், “பாசிச பாஜக” என நீண்டகாலமாக தீவிரமாக எதிர்த்து வந்த கொள்கையைத் கைவிட்டு, இப்போது பாஜகவுடன் இணந்தால் அது 2029 நாடாளுமன்றத் தேர்தலில் பெரும் பாதிப்பை ஏற்படுத்துமா என்ற அச்சமும் திமுகவிற்குள் நிலவுகிறது. அதேசமயம், தாராபுரம் மற்றும் மதுராந்தகம் இடைத்தேர்தல் முடிவுகள் திமுகவிற்கு நம்பிக்கையைத் தரும் வகையில் அமைந்துள்ளதையும் தலைமை உன்னிப்பாகக் கவனித்து வருகிறது.

பாஜக தரப்பில் இருந்து வந்துள்ள ஆஃபரின்படி, நாடாளுமன்றத்தில் தொகுதி மறுவரையறை மசோதாவை நிறைவேற்ற உதவினால், 2029-ல் நாடாளுமன்றத் தேர்தலுடன் சேர்த்து தமிழ்நாட்டில் சட்டமன்றத் தேர்தலையும் நடத்த அனுமதிக்கப்படும் என்ற பேச்சுவார்த்தைகள் திரைமறைவில் நடப்பதாகத் தகவல்கள் கசிந்துள்ளன. இதனால் இன்னும் ஐந்து ஆண்டுகள் காத்திருக்காமல் உடனே ஆட்சியைப் பிடிக்க இது ஒரு வாய்ப்பாகப் பார்க்கப்படுகிறது.

முழுமையான நேரடி கூட்டணிக்கு பதிலாக, தமிழக நலன் கருதி குறைந்தபட்ச செயல்திட்டத்தின் (CMP) அடிப்படையில் மத்திய அமைச்சரவையில் இணையலாம் என்ற விவாதங்களும் கட்சிக்குள் முன்வைக்கப்பட்டுள்ளன. கருணாநிதி பின்பற்றிய அரசியல் உத்திகளை மீள்பார்வை செய்யும் யோசனைகளும் இந்த ஆலோசனைக் கூட்டத்தில் விவாதிக்கப்பட்டதாகத் தெரிகிறது.

இதற்கிடையே, வாக்காளர் பட்டியல் நீக்கம் மற்றும் SIR நடவடிக்கைகள் குறித்து உச்சநீதிமன்றத்தின் கருத்தைக் கோரி மு.க.ஸ்டாலின் குடியரசுத் தலைவருக்குக் கடிதம் எழுதியுள்ளார். மேலும், அக்கடிதத்தில் ‘இந்தியா’ கூட்டணியைக் குறிப்பிட்டுள்ளதன் மூலம், பாஜகவுடன் இப்போதைக்கு எந்த உடன்பாடும் இல்லை என்ற சமிக்ஞையையும் திமுக தலைமை வெளிப்படுத்தியுள்ளது.

இதுகுறித்து விளக்கம் அளித்துள்ள திமுக அமைப்புச் செயலாளர் ஆர்.எஸ்.பாரதி, பாஜக கூட்டணியில் திமுக இணைவது மத்திய அமைச்சரவையில் இடம்பெறுவது போன்ற தகவல்கள் அனைத்தும் முற்றிலும் வதந்திகளே என திட்டவட்டமாக மறுத்துள்ளார். எனினும், மாறிவரும் அரசியல் சூழலில் தமிழ்நாட்டில் அடுத்தடுத்து என்னென்ன திருப்பங்கள் நிகழப் போகின்றன என்பதைப் பொறுத்திருந்துதான் பார்க்க வேண்டும்.