“நெஞ்சை உலுக்கும் சோகம்… மரணக் குழிக்கு பலியான 4 வயது குழந்தை..!”அலட்சியத்தின் உச்சத்தால் துடிதுடித்த பிஞ்சு உயிர்…!!

உத்தரப் பிரதேச மாநிலம் பரேலியில் உள்ள மீர்கஞ்ச் தானா எல்லைக்குட்பட்ட ஜௌனெர் கிராமத்தில், பாதுகாப்பற்ற முறையில் திறந்த நிலையில் இருந்த ஆழமான பள்ளத்தில் விழுந்து அலீம் என்ற நான்கு வயது சிறுவன் பரிதாபமாக உயிரிழந்தான். வீட்டின் அருகே விளையாடச் சென்ற சிறுவன் நீண்ட நேரமாகியும் வீடு திரும்பாததால், அவனது தாயும் கிராம மக்களும் தேடியுள்ளனர். அப்போது, அண்மையில் பெய்த மழையால் தண்ணீர் நிரம்பியிருந்த 10 அடி ஆழமுள்ள ஒரு பள்ளத்தில் அச்சிறுவனின் உடல் மிதப்பதைக் கண்டு அதிர்ச்சியடைந்து மீட்டனர். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.

இந்த விபத்துக்கு கிராம ஊராட்சித் தலைவரின் கடுமையான அலட்சியமே காரணம் என்று கிராம மக்கள் குற்றம் சாட்டியுள்ளனர். சாலைகளில் தேங்கும் தண்ணீரை வெளியேற்றுவதற்காகவும், குப்பைகளை அகற்றுவதற்காகவும் இந்த ஆழமான குழி தோண்டப்பட்டதாகக் கூறப்படுகிறது. ஆனால், மக்கள் நடமாட்டம் உள்ள பகுதியில் தோண்டப்பட்ட இந்த ஆபத்தான குழிக்குச் சுற்றிலும் எவ்வித தடுப்புகளோ அல்லது எச்சரிக்கைப் பலகைகளோ வைக்கப்படவில்லை. மேலும், மழைநீருடன் பிளாஸ்டிக் மற்றும் கழிவுகள் மிதந்ததால் குழி எவ்வளவு ஆழமானது என்பதை அறிய முடியாத நிலை இருந்துள்ளது. இதுகுறித்து முன்னரே புகார்கள் அளிக்கப்பட்டும் எவ்வித நடவடிக்கையும் எடுக்கப்படவில்லை என மக்கள் தெரிவிக்கின்றனர்.

சிறுவனின் மரணத்தால் ஆத்திரமடைந்த கிராம மக்கள், ஊராட்சித் தலைவருக்கு எதிராக அந்த இடத்திலேயே திரண்டு போராட்டம் மற்றும் கோஷங்களை எழுப்பினர். உயிரிழந்த சிறுவனின் தந்தை டெல்லியில் கூலித் தொழிலாளியாக வேலை பார்த்து வரும் வேளையில், இந்த துயரச் செய்தி கேட்டு கிராமத்திற்கு விரைந்துள்ளார். சம்பவ இடத்திற்கு வந்த போலீசார் சிறுவனின் உடலைக் கைப்பற்றி பிரேதப் பரிசோதனைக்கு அனுப்பி வைத்துள்ளனர். இச்சம்பவம் குறித்து வழக்குப் பதிவு செய்யப்பட்டு, தீவிர விசாரணை நடத்தப்பட்டு வருவதாக காவல்துறை தரப்பில் தெரிவிக்கப்பட்டுள்ளது.