தென்காசி மாவட்டம் மேல நீலிதநல்லூர் கிராமத்தைச் சேர்ந்த அதிமுக பிரமுகரான வேலியப்பன் கடந்த 2024 ஆம் ஆண்டு ஆகஸ்ட் மாதம் கொலை செய்யப்பட்டார். இந்த வழக்கில் அதே பகுதியைச் சேர்ந்த அண்ணன் தம்பிகளான பாலமுருகன், முத்துராஜ் உள்ளிட்ட 4 பேர் கைது செய்யப்பட்ட நிலையில் கடந்த சில மாதங்களுக்கு முன்பு ஜாமீனில் வெளியே வந்தனர்.
இதில் முத்துராஜ் சென்னையில் உள்ள காவல் நிலையத்தில் தினமும் கையெழுத்து போட்டு வந்த நிலையில் ஆலந்தூர் பகுதியில் உள்ள டாஸ்மாக் பாரில் பணிபுரிந்து வந்தார். இந்த நிலையில் கொலை செய்யப்பட்ட வேலியப்பனின் அண்ணன் மகனான கார்த்திக் என்பவர் பழிக்கு பழி வாங்க வேண்டும் என திட்டம் போட்டார். இதற்காக கற்படம் கிராமத்தைச் சேர்ந்த கூலிப்படையிடம் 10 லட்ச ரூபாய் பேரம் பேசியுள்ளார். இதனை அறிந்த முத்துராஜ் கிருஷ்ணகிரிக்கு சென்று உறவினர் வீட்டில் தஞ்சம் அடைந்தார்.
சம்பவம் நடைபெற்ற அன்று கூலிப்படையைச் சேர்ந்தவர்கள் முத்துராஜை கண்டுபிடித்து பேருந்து நிலையத்தில் வைத்து அவரை கொலை செய்ய சுற்றி வளைத்தனர். உடனே பொதுமக்கள் அளித்த தகவலின் படி போலீசார் சம்பவ இடத்திற்கு விரைந்து சென்று கூலிப்படையினரை கைது செய்து முத்துராஜை மீட்டனர். இதனால் அவர் அதிர்ஷ்டவசமாக உயிர் தப்பினார். இந்த சம்பவம் அப்பகுதியில் பரபரப்பை ஏற்படுத்தியுள்ளது.