தமிழக சட்டப்பேரவையில் இன்று தாக்கல் செய்யப்பட்ட 2026-27 நிதியாண்டிற்கான இடைக்கால பட்ஜெட்டில், தமிழகத்தின் கலை மற்றும் பண்பாட்டைப் பாதுகாக்கும் வகையில் ரூ.285 கோடி மதிப்பீட்டில் புதிய அருங்காட்சியகங்கள் அமைக்கப்படும் என நிதியமைச்சர் தங்கம் தென்னரசு அறிவித்துள்ளார். ஈரோட்டில் நொய்யல் அருங்காட்சியகம், ராமநாதபுரத்தில் நாவாய் அருங்காட்சியகம் உள்ளிட்ட புதிய திட்டங்கள் இதன் மூலம் செயல்படுத்தப்பட உள்ளன. ஏற்கெனவே கீழடி மற்றும் பொருநை போன்ற இடங்களில் தமிழர் பெருமையை உலகறியச் செய்யும் வகையில் அருங்காட்சியகங்கள் அமைக்கப்பட்டுள்ளதைச் சுட்டிக்காட்டிய அவர், இந்த புதிய முன்னெடுப்புகள் இளைய தலைமுறைக்கு நமது வரலாற்றைக் கொண்டு சேர்க்கும் எனத் தெரிவித்தார்.
பண்பாட்டுத் துறைக்கான முக்கிய அறிவிப்புகளில் ஒன்றாக, உலகப் பொதுமறையான திருக்குறளை ஐக்கிய நாடுகள் சபையின் 6 அதிகாரப்பூர்வ மொழிகளில் மொழிபெயர்க்கும் பணிகள் மிகத் தீவிரமாக நடைபெற்று வருவதாக நிதியமைச்சர் குறிப்பிட்டார். உலக அரங்கில் தமிழின் தொன்மையையும், திருக்குறளின் அறநெறிகளையும் பறைசாற்றும் நோக்கில் இந்த முயற்சி மேற்கொள்ளப்பட்டுள்ளது. மேலும், அடுத்த மூன்று ஆண்டுகளில் சுமார் 193 நாடுகளின் மொழிகளில் திருக்குறளைக் கொண்டு செல்ல அரசு திட்டமிட்டுள்ளதாகவும், இதற்காகப் பிரத்யேக நிதி ஒதுக்கீடு செய்யப்பட்டுள்ளதாகவும் பட்ஜெட் உரையில் தெரிவிக்கப்பட்டுள்ளது.