மத்தியப் பிரதேச மாநிலம் போபாலில், காலி மனை ஒன்றில் இருந்த தண்ணீர் தொட்டிக்குள் இரும்புப் பெட்டி ஒன்றில் பெண் ஒருவரின் சடலம் கண்டெடுக்கப்பட்டது அப்பகுதியில் பெரும் பரபரப்பை ஏற்படுத்தியுள்ளது. விசாரணையில், உயிரிழந்தவர் மகாராஷ்டிர மாநிலத்தைச் சேர்ந்த அஷ்ரஃபி என்கிற சியா (33) என்பது தெரியவந்தது. இன்ஸ்டாகிராம் மூலம் அறிமுகமான போபாலைச் சேர்ந்த சமீர் என்ற ஆட்டோ ஓட்டுநரை சியா காதலித்து, குடும்பத்தினரின் எதிர்ப்பையும் மீறி திருமணம் செய்து கொண்டுள்ளார்.
ஆட்டோ ஓட்டுநர் சமீர் ஏற்கனவே இருமுறை திருமணமானவர் என்ற உண்மையை மறைத்து சியாவைத் திருமணம் செய்துள்ளார். தனது மூன்றாவது மனைவியான சியாவை, அக்கம் பக்கத்தினரிடம் ‘மைத்துனி’ என்று பொய் சொல்லி ஒரே வீட்டில் தங்க வைத்துள்ளார். இதனால் ஏற்பட்ட குடும்பத் தகராறில் சமீரின் இரண்டாவது மனைவி வீட்டை விட்டு வெளியேறியுள்ளார். கடந்த பிப்ரவரி 9-ம் தேதி சமீர் மற்றும் சியாவுக்கு இடையே ஏற்பட்ட கடும் வாக்குவாதத்தில், ஆத்திரமடைந்த சமீர் சியாவின் கழுத்தை நெரித்துக் கொலை செய்துள்ளார்.
இந்தக் கொலையை மறைக்கத் திட்டமிட்ட சமீர், தனது இரண்டாவது திருமணத்தின் போது வரதட்சணையாகக் கிடைத்த அதே இரும்புப் பெட்டிக்குள் சியாவின் உடலைத் திணித்துள்ளார். பின்னர் அந்தப் பெட்டியை அருகில் இருந்த செப்டிக் டேங்கிற்குள் வீசிவிட்டுத் தப்பிச் சென்றுள்ளார். சடலம் மிகவும் சிதைந்த நிலையில் இருந்ததால் அடையாளம் காண்பதில் சிக்கல் நீடித்தது. இருப்பினும், சியாவின் கையில் இருந்த ‘தீப்’ (Deep) என்ற பச்சை குத்தப்பட்ட அடையாளத்தை வைத்துப் போலீஸார் அவரை அடையாளம் கண்டனர்.
இன்ஸ்டாகிராம் போன்ற சமூக வலைதள மோகமும், முறையற்ற திருமண உறவுகளும் ஒரு பெண்ணின் உயிரைப் பறித்துள்ள இந்தச் சம்பவம் மிகுந்த சோகத்தை ஏற்படுத்தியுள்ளது. தற்போது தலைமறைவாக உள்ள கொலையாளி சமீரைப் பிடிக்கப் போலீஸார் தனிப்படை அமைத்துத் தீவிரமாகத் தேடி வருகின்றனர். ஒரு பெண்ணின் திருமணத்திற்காக வரதட்சணையாக வந்த பெட்டியே, மற்றொரு பெண்ணின் சவப்பெட்டியாக மாறியுள்ள அவலம் சமூக வலைதளங்களில் விவாதப் பொருளாகியுள்ளது.