திருப்பத்தூர் நகராட்சிக்கு உட்பட்ட வெங்கடேஸ்வரா நகர் பகுதியைச் சேர்ந்த சற்குணத்தின் மகன் சஞ்சய் பிரவீன் (21). கணினி பயிற்சி வகுப்புக்குச் சென்று வந்த இவருக்கு, கடந்த சில காலமாக மனநலப் பிரச்சினையும், கஞ்சா பழக்கமும் இருந்ததாகக் கூறப்படுகிறது. இதனால் அடிக்கடி பெற்றோரிடம் கஞ்சா வாங்க பணம் கேட்டுத் தகராறு செய்துள்ளார். கடந்த 11-ஆம் தேதி பெற்றோர் பணம் தர மறுத்ததால், கோபித்துக் கொண்டு வீட்டை விட்டு வெளியேறிய சஞ்சய் பிரவீன், அதன் பின்னர் வீடு திரும்பவில்லை. உறவினர்கள் பல இடங்களில் தேடியும் அவரைப் பற்றிய எந்தத் தகவலும் கிடைக்கவில்லை.
இந்த நிலையில், வெங்கடேஸ்வரா நகர் பகுதியில் உள்ள ஒரு விவசாயக் கிணற்றில் இளைஞரின் உடல் மிதப்பதாகத் திருப்பத்தூர் கிராமிய காவல் துறையினருக்கு தகவல் கிடைத்தது. உடனே சம்பவ இடத்திற்கு விரைந்த போலீசார், தீயணைப்பு மற்றும் மீட்புப் படையினரின் உதவியுடன் சஞ்சய் பிரவீனின் உடலை மீட்டு பிரேதப் பரிசோதனைக்காகத் திருப்பத்தூர் அரசு மருத்துவமனைக்கு அனுப்பி வைத்தனர். முதற்கட்ட விசாரணையில், சஞ்சய் பிரவீன் உயிரிழப்பதற்கு முன்பு தனது கையில் கல்லை கட்டிக் கொண்டிருந்ததாகத் தெரிய வந்துள்ளது.
இருப்பினும், இளைஞரின் உயிரிழப்புக்கான சரியான காரணம் பிரேதப் பரிசோதனை அறிக்கை மற்றும் முழுமையான விசாரணைக்குப் பிறகே உறுதியாகத் தெரியும் என அதிகாரிகள் தெரிவித்துள்ளனர். இச்சம்பவம் குறித்து வழக்குப் பதிவு செய்துள்ள போலீசார், அவரது உடல்நிலை, போதை பழக்கம் உள்ளிட்ட பல்வேறு கோணங்களில் தீவிர விசாரணை நடத்தி வருகின்றனர். இந்தத் துயரச் சம்பவம் அப்பகுதியில் பெரும் சோகத்தை ஏற்படுத்தியுள்ளதுடன், இளைஞர்களிடையே அதிகரித்து வரும் போதைப் பொருள் பழக்கத்தின் கொடூர விளைவுகள் குறித்த கவலையையும் விழிப்புணர்வையும் மீண்டும் எழுப்பியுள்ளது.