கேரள அரசு ஊழியர்கள் மற்றும் ஓய்வூதியதாரர்களின் நீண்ட நாள் கோரிக்கையை ஏற்று, வரும் ஓணம் பண்டிகையை முன்னிட்டு அகவிலைப்படியை மேலும் 2% உயர்த்த மாநில அரசு திட்டமிட்டுள்ளது. நடப்பு 2026 ஆம் ஆண்டில் வழங்கப்படும் இரண்டாவது DA உயர்வு இதுவாகும்; ஏற்கனவே கடந்த பிப்ரவரியில் 10% உயர்த்தப்பட்ட நிலையில், தற்போது இது 37% ஆக அதிகரிக்கும். இதற்கான நிதி அமைச்சகத்தின் உள் துறை தயாரிப்புகள் முடிந்துவிட்டதால், ஆகஸ்ட் மாத இறுதிக்குள் அதிகாரப்பூர்வ அரசாணை வெளியாகி, ஓணம் பண்டிகைக்கு முன்னரே ஆகஸ்ட் மாத சம்பளத்துடன் இந்த உயர்வு கிடைக்க வாய்ப்புள்ளது.
அடிப்படை சம்பளத்தின் அடிப்படையில் கணக்கிடப்படும் இந்த 2% உயர்வால், ஊழியர்களின் மாதாந்திர சம்பளம் ரூ 600 முதல் ரூ 1,200 வரை அதிகரிக்கும். பழைய சம்பள விகிதத்தில் உள்ளவர்கள் உட்பட அனைத்து மாநில அரசு ஊழியர்கள், ஆசிரியர்கள், உள்ளாட்சி அமைப்பு ஊழியர்கள் மற்றும் ஓய்வூதியதாரர்கள் என லட்சக்கணக்கானோர் இதன் மூலம் பயனடைவர். நிதி நெருக்கடிக்கு மத்தியிலும் ஊழியர்களின் பண்டிகை கால மகிழ்ச்சிக்காக அரசு எடுத்துள்ள இந்த முடிவினால், கேரள மாநில கருவூலத்திற்கு ஆண்டுக்குக் கூடுதலாக ரூ 60 கோடி நிதிச்சுமை ஏற்படும்.
கேரளாவைத் தொடர்ந்து பிற மாநிலங்களும் அகவிலைப்படி உயர்வு மற்றும் நிலுவைத்தொகை குறித்து ஆலோசித்து வருகின்றன. பஞ்சாப் அரசு, 2021 முதல் 2024 வரையிலான காலக்கட்டத்திற்கு நிலுவையில் உள்ள அகவிலைப்படி மற்றும் திருத்தப்பட்ட சம்பளப் பலன்களின் நிலுவைத் தொகையை வழங்குவது குறித்து பரிசீலித்து வருகிறது. அதேபோல், இமாச்சலப் பிரதேச முதலமைச்சர் சுக்விந்தர் சிங் சுகு, அரசு ஊழியர்களின் நலனைப் பாதுகாக்கும் நோக்கில் நிலுவையில் உள்ள ஓய்வூதியம் மற்றும் அகவிலைப்படி தொகைகளை மறுஆய்வு செய்து, அவற்றை விடுவிக்க நிதித் துறைக்கு உத்தரவிட்டுள்ளார்.