மும்பை மலார்ட் கிழக்கில் உள்ள சாரதா பாய் கோவிந்த் பவார் பூங்காவின் கழிப்பறையில், 19 வயதான அமன் சோனி என்ற வாலிபர் போதைப்பொருள் உட்கொண்டதால் பரிதாபமாக உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. சிலர் அவரை கட்டாயப்படுத்தி போதைப்பொருளை உட்கொள்ள வைத்து, உடலில் ஊசி மூலம் ஏற்றியதாக திடுக்கிடும் குற்றச்சாட்டுகள் எழுந்துள்ளன. மேலும், இச்சம்பவம் தொடர்பாக பெறப்பட்ட வீடியோ ஆதாரங்களை அழிக்குமாறு குரார் காவல் நிலைய அதிகாரி ஒருவர், பாதிக்கப்பட்ட குடும்பத்தினரை வற்புறுத்தியதாகக் கூறப்படும் தகவல் விவகாரத்தை மேலும் தீவிரமாக்கியுள்ளது.
மும்பை மாநகராட்சிக்குச் சொந்தமான பூங்காவில் போதுமான பாதுகாப்பு, சிசிடிவி கண்காணிப்பு மற்றும் ரோந்துப் பணிகள் இல்லாததால், அங்கு பகிரங்கமாக போதைப்பொருள் பயன்பாடு அதிகரித்து வருவதாக பொதுமக்கள் அச்சம் தெரிவித்துள்ளனர். மேலும், இந்த விவகாரத்தில் முறையான மற்றும் சுதந்திரமான விசாரணை நடத்தப்பட வேண்டும் என்றும், தவறழைத்த அதிகாரிகள் மீது உரிய நடவடிக்கை எடுக்கப்பட வேண்டும் என்றும் அம்மாநில முதலவர் தேவேந்திர பட்னாவிஸ் மற்றும் மும்பை காவல் ஆணையருக்குக் கோரிக்கைகள் விடுக்கப்பட்டு வருகின்றன.
நமது குழந்தைகளின் எதிர்காலத்தையும் பாதுகாப்பையும் உறுதி செய்ய, அதிகரித்து வரும் போதைப்பொருள் அச்சுறுத்தலுக்கு எதிராக உடனடியாகக் கடுமையான நடவடிக்கை எடுக்கப்பட வேண்டியது அவசியமாகும். இத்தகைய சமூகச் சீர்கேடுகளை வேரோடு அழிக்க அரசு மற்றும் காவல்துறை இணைந்து விரைந்து செயலாற்ற வேண்டும் என்று சமூக ஆர்வலர்களும் பொதுமக்களும் வலியுறுத்தி வருகின்றனர்.