சென்னை கோயம்பேடு பகுதியில் உள்ள பார் ஒன்றில் நேற்று இரவு இரு தரப்பினரிடையே குடித்துவிட்டு நடனம் ஆடும்போது தகராறு ஏற்பட்டுள்ளது. அங்கிருந்த பவுன்சர்கள் அவர்களை வெளியேற்றிய பிறகும், அருகிலுள்ள கடை வாசலில் மீண்டும் மோதிக் கொண்டனர். பவுன்சர்கள் அவர்களைத் தடுத்து அங்கிருந்து அனுப்பி வைத்ததைத் தொடர்ந்து, ஒரு தரப்பினர் மூன்று இருசக்கர வாகனங்களிலும், மற்றொரு தரப்பினர் சொகுசு காரிலும் அங்கிருந்து புறப்பட்டுச் சென்றனர்.
அப்போது இருசக்கர வாகனத்தில் சென்றவர்கள் காரின் மீது கற்களை வீச முயன்றதாகக் கூறப்படுகிறது. இதனால் ஆத்திரமடைந்த காரில் இருந்த நபர்கள், வாகனத்தை வேகமாக இயக்கி அவர்களை இடிக்க முயன்றனர். அப்போது எதிர்பாராதவிதமாக, அந்த வழியே மற்றொரு இருசக்கர வாகனத்தில் வந்த இரண்டு பெண்கள் மீது கார் பயங்கரமாக மோதியது. இதில் தூக்கி வீசப்பட்ட 18 வயதுடைய யான்சி என்ற பெண் தலையில் பலத்த காயமடைந்து சம்பவ இடத்திலேயே பரிதாபமாக உயிரிழந்தார். அவருடன் வந்த 17 வயது தோழி பலத்த காயங்களுடன் கீழ்ப்பாக்கம் அரசு மருத்துவமனையில் அனுமதிக்கப்பட்டுள்ளார்.
போலீசாரின் முதற்கட்ட விசாரணையில், உயிரிழந்த யான்சி விழுப்புரம் மாவட்ட இலங்கைத் தமிழர் மறுவாழ்வு முகாமில் வசித்து வந்தவர் என்பதும், திருவள்ளூரில் உள்ள தோழியைப் பார்க்க வந்தவர் கடந்த 10 நாட்களாகப் பக்கத்து ஊரைச் சேர்ந்த பவுசியா தீபிகா என்பவரது வீட்டில் தங்கியிருந்ததும் தெரியவந்தது. கடந்த 28ஆம் தேதி சினிமாவுக்குச் சென்றுவிட்டு மறுநாள் காலை தாமதமாக வந்ததால் பவுசியாவின் தாய் திட்டியுள்ளார். இதனால் வீட்டை விட்டு வெளியேறிய போதே இந்தத் துயர விபத்தில் அவர்கள் சிக்கியுள்ளனர். காரை ஓட்டி விபத்தை ஏற்படுத்திய சுமன் என்பவரைப் போலீசார் தீவிரமாகத் தேடி வருகின்றனர்.