திருப்பூர் மாவட்டம் ஊத்துக்குளி பகுதியில் உள்ள ஒரு தனியார் பள்ளியில், 12-ஆம் வகுப்பு படித்து வந்த 17 வயது மாணவிக்கு நேர்ந்த கொடூரம் அப்பகுதியில் பெரும் பரபரப்பையும் அதிர்ச்சியையும் ஏற்படுத்தியுள்ளது. அந்தப் பள்ளியில் அலுவலக உதவியாளராகப் பணிபுரிந்து வந்த முகமது பாட்ஷா (32) என்ற திருமணமான நபர், மாணவியுடன் நெருக்கமாக பழகி, ஆசை வார்த்தைகளைக் கூறி அவரைப் பாலியல் வன்கொடுமை செய்துள்ளார். “இதனால் ஒன்றும் ஆகாது” என அந்த சிறுமியைத் தொடர்ச்சியாக ஏமாற்றி, மீண்டும் மீண்டும் பாலியல் ரீதியாகத் துன்புறுத்தி வந்துள்ளார்.
சமீபத்தில் அந்த மாணவிக்கு கடுமையான வயிற்று வலி ஏற்பட்டதை அடுத்து, சந்தேகமடைந்த பெற்றோர்கள் அவரை மருத்துவமனைக்கு அழைத்துச் சென்று பரிசோதித்துள்ளனர். அப்போது அந்த சிறுமி கர்ப்பமாக இருப்பது தெரியவந்தது. பெற்றோரின் விசாரணையில், பள்ளியின் அலுவலக உதவியாளர் முகமது பாட்ஷா செய்த துரோகம் வெளிச்சத்திற்கு வந்தது. இதனால் அதிர்ச்சியடைந்த பெற்றோர், உடனடியாக காங்கேயம் அனைத்து மகளிர் காவல் நிலையத்தில் புகார் அளித்தனர். புகாரின் பேரில் விரைந்து செயல்பட்ட காவல்துறையினர், முகமது பாட்ஷாவை போக்சோ (POCSO) சட்டத்தின் கீழ் கைது செய்து, நீதிமன்றத்தில் ஆஜர்படுத்தி சிறையில் அடைத்தனர்.
கல்வி கற்கச் சென்ற இடத்தில், பாதுகாப்பாக இருக்க வேண்டிய பள்ளியிலேயே மாணவிக்கு நேர்ந்த இந்த கொடூர சம்பவம் பொதுமக்களிடையே பெரும் கொந்தளிப்பை ஏற்படுத்தியுள்ளது. பெண்கள் மற்றும் பெண் குழந்தைகளுக்கு எதிராகத் தொடர்ந்து அதிகரித்து வரும் இத்தகைய பாலியல் குற்றங்கள் சமூகத்தில் பெரும் அதிர்ச்சியை உண்டாக்குகின்றன. இது போன்ற குழந்தைகளுக்கு எதிரான குற்றங்களைத் தடுக்கவும், பாதிக்கப்பட்டவர்களுக்கு உரியப் பாதுகாப்பு மற்றும் ஆலோசனைகளை வழங்கவும் அரசுத் தரப்பில் 1098 என்ற இலவச குழந்தைகளுக்கான உதவி எண்கள் (Childline Helpline) செயல்பட்டு வருகின்றன என்பது குறிப்பிடத்தக்கது.