திடீரென விலக்கப்பட்ட பாதுகாப்பு.. அடுத்த நிமிடம் புதுச்சேரியில் குவிந்த அதிமுக எம்.எல்.ஏக்கள்…. தமிழக அரசியலை உலுக்கும் ‘மெகா’ பிளான்….!

தமிழக அரசியலில் முன்னெப்போதும் இல்லாத வகையில் ஒரு அசாதாரணமான சூழல் நிலவி வருகிறது. தமிழக வெற்றிக் கழகத் தலைவர் விஜய் ஆட்சியமைக்க உரிமை கோரி ஆளுநரிடம் கடிதம் அளித்துள்ள நிலையில், ஆளுநர் தரப்பிலிருந்து இதுவரை முறையான அழைப்பு விடுக்கப்படவில்லை. இதற்கிடையில், விஜய்க்கு வழங்கப்பட்டிருந்த கான்வாய் பாதுகாப்பு திடீரென விலக்கப்பட்டிருப்பது அரசியல் வட்டாரத்தில் பெரும் அதிர்ச்சியை ஏற்படுத்தியுள்ளது. தவெக-வின் அடுத்தகட்ட நகர்வுகளைத் தடுக்கும் நோக்கில் அதிகார மட்டத்தில் இத்தகைய நடவடிக்கைகள் எடுக்கப்படுவதாகப் பரவலாகப் பேசப்படுகிறது.

மறுபுறம், அதிமுக முன்னாள் அமைச்சர் சி.வி.சண்முகம் தலைமையில் சுமார் 15 எம்.எல்.ஏக்கள் புதுச்சேரி பூரணங்குப்பத்தில் உள்ள சொகுசு விடுதியில் ரகசியமாகத் தங்க வைக்கப்பட்டுள்ளனர். ஓ.எஸ்.மணியன், தளவாய் சுந்தரம் போன்ற மூத்த தலைவர்களும் அங்கு முகாமிட்டுள்ளதால், அதிமுகவின் ஒரு தரப்பினர் விஜய்க்கு ஆதரவு அளிக்கத் திட்டமிட்டு வருகின்றனரோ என்ற சந்தேகம் எழுந்துள்ளது. தவெக-வுக்கு ஆதரவு அளிப்பது குறித்து சி.வி.சண்முகம் மற்றும் எஸ்.பி.வேலுமணி ஆகியோர் எடப்பாடி பழனிசாமியுடன் தீவிர ஆலோசனையில் ஈடுபட்டது இந்தச் சந்தேகத்தை மேலும் வலுப்படுத்தியுள்ளது.

நேற்று நடைபெற்ற அதிமுக எம்.எல்.ஏக்கள் கூட்டத்தில் தவெக-வுக்கு ஆதரவு அளிப்பது தொடர்பாக இருவேறு கருத்துக்கள் மோதிக்கொண்டதாகத் தெரிகிறது. எடப்பாடி பழனிசாமி தலைமையில் நடந்த இந்த ஆலோசனையில், ஒரு தரப்பினர் ஆதரவு வழங்கலாம் என்று வாதிட்ட நிலையில், கட்சியின் துணைப் பொதுச்செயலாளர் கே.பி. முனுசாமி அதனைத் திட்டவட்டமாக மறுத்துள்ளார். செய்தியாளர்களிடம் பேசிய அவர், “எந்தச் சூழ்நிலையிலும் தமிழக வெற்றிக் கழகத்திற்கு அதிமுக ஆதரவு அளிக்காது” என்று கூறி, கட்சிக்குள் நிலவும் குழப்பங்களுக்கு முற்றுப்புள்ளி வைக்க முயன்றார்.

இந்த அதிரடித் திருப்பங்களுக்கு மத்தியில், பரம எதிரிகளாகக் கருதப்படும் திமுக-வும் அதிமுக-வும் தவெக ஆட்சியமைப்பதைத் தடுக்கக் கைகோர்க்கப் போவதாகப் புதிய தகவல் தீயாய் பரவி வருகிறது. தமிழகத்தின் இரண்டு முக்கிய திராவிடக் கட்சிகளும் தங்களுக்குப் போட்டியாக உருவெடுத்துள்ள புதிய சக்தியை முடக்கத் திரைமறைவில் கூட்டணி அமைக்க உள்ளதாக அரசியல் விமர்சகர்கள் மற்றும் மூத்த பத்திரிகையாளர்கள் சமூக வலைதளங்களில் பதிவிட்டு வருகின்றனர். எம்.எல்.ஏக்கள் ரிசார்ட்டில் தங்க வைக்கப்பட்டுள்ளதும், பாதுகாப்பு விலக்கப்பட்டிருப்பதும் தமிழக அரசியலில் ஒரு பெரிய மாற்றத்திற்கான அறிகுறியாகவே பார்க்கப்படுகிறது.