மறைந்த முன்னாள் முதலமைச்சர் ஜெயலலிதாவின் பிறந்தநாளை முன்னிட்டு, அதிமுக பொதுச்செயலாளர் எடப்பாடி பழனிசாமி இன்று அக்கட்சியின் முதற்கட்ட வேட்பாளர் பட்டியலை வெளியிட உள்ளார். பிப்ரவரி 24-ம் தேதியான இன்று, ஜெயலலிதாவின் பிறந்தநாளுடன் வளர்பிறை அஷ்டமியும் இணைந்து வருவது ஒரு வரலாற்றுச் சிறப்புமிக்க நிகழ்வாகப் பார்க்கப்படுகிறது. மறைந்த முன்னாள் முதல்வர் ஜெயலலிதா எப்போதுமே வளர்பிறை அஷ்டமி மற்றும் பஞ்சமி போன்ற சுப நாட்களில் முக்கிய முடிவுகளை எடுப்பார் என்பதால், அதே பாணியை எடப்பாடியாரும் தற்போது பின்பற்றியுள்ளார்.
முதற்கட்டமாக சுமார் 15 வேட்பாளர்கள் அடங்கிய பட்டியல் இன்று வெளியாகும் என எதிர்பார்க்கப்படுகிறது. இந்த 15 அதிர்ஷ்டசாலிகள் யார், அவர்கள் எந்தெந்த தொகுதிகளில் போட்டியிடப் போகிறார்கள் என்பது குறித்து அரசியல் வட்டாரத்தில் பெரும் எதிர்பார்ப்பு எழுந்துள்ளது. இதில் கட்சியின் முக்கியத் தூண்களாகத் திகழும் முன்னாள் அமைச்சர்கள் மற்றும் தற்போதைய சட்டமன்ற உறுப்பினர்களின் பெயர்கள் இடம்பெற அதிக வாய்ப்புள்ளதாகத் தெரிகிறது.
இந்த வேட்பாளர் பட்டியலில் ஒரு பெண் வேட்பாளரின் பெயரும் ரகசியமாக வைக்கப்பட்டுள்ளதாகத் தகவல்கள் கசிந்துள்ளன. இந்த பட்டியலை இறுதி செய்வதற்கு முன்னதாகத் திருப்பதி கோவிலில் வைத்துச் சிறப்புப் பூஜைகள் நடத்தப்பட்டதாகவும் கூறப்படுகிறது. தேர்தல் களம் சூடுபிடித்துள்ள இந்த சூழலில், எடப்பாடி பழனிசாமியின் இந்த அதிரடி முடிவு மற்ற அரசியல் கட்சிகளுக்குப் பெரும் சவாலாகவும், வியப்பாகவும் அமைந்துள்ளது.
வேட்பாளர் பட்டியல் வெளியீடு மட்டுமன்றி, இன்று அதிமுக தலைமையகத்தில் ‘சமூக நீதியைக் காத்த காவலர் எடப்பாடியார்’ என்ற புத்தக வெளியீட்டு விழாவும் நடைபெறுகிறது. முன்னாள் அமைச்சர் கே.டி. ராஜேந்திர பாலாஜி எழுதிய இந்தப் புத்தகத்தை எடப்பாடி பழனிசாமி வெளியிடுகிறார். ஜெயலலிதாவின் பிறந்தநாளில் வேட்பாளர் அறிவிப்பு மற்றும் புத்தக வெளியீடு என அடுத்தடுத்து அதிரடி காட்டும் அதிமுக, தனது தேர்தல் பிரசாரத்தை இன்றைய நன்னாளில் உற்சாகத்துடன் தொடங்குகிறது.