சென்னையில் நடைபெற்ற திமுகவின் உயர்மட்ட செயற்குழு கூட்டத்தில், கட்சியின் நிர்வாகத்தில் இளைஞர்களுக்கும் புதியவர்களுக்கும் அதிக வாய்ப்பளிக்கும் வகையில் முக்கிய முடிவுகள் எடுக்கப்பட்டுள்ளன. இந்த கூட்டத்தில் நிறைவேற்றப்பட்ட வரலாற்றுச் சிறப்புமிக்க தீர்மானத்தின்படி, திமுக மாவட்டச் செயலாளர்களின் அதிகபட்ச வயது வரம்பு 70 ஆக நிர்ணயிக்கப்பட்டுள்ளது. கட்சியின் கட்டமைப்பை மேலும் பலப்படுத்தவும், வருங்கால சவால்களை எதிர்கொள்ளவும் இந்த அதிரடி நடவடிக்கை மேற்கொள்ளப்பட்டுள்ளதாகக் கருதப்படுகிறது.
இந்த புதிய வயது வரம்பு விதியின் காரணமாக, 70 வயதைக் கடந்த மூத்த தலைவர்கள் பலர் தங்களது மாவட்டச் செயலாளர் பதவிகளை இழக்கும் சூழல் உருவாகியுள்ளது. குறிப்பாக, க. சுந்தர் (காஞ்சிபுரம் தெற்கு – 72), ஆர். காந்தி (இராணிப்பேட்டை – 80), எ. வ. வேலு (திருவண்ணாமலை தெற்கு – 75), செஞ்சி மஸ்தான் (விழுப்புரம் வடக்கு – 71), எஸ்.ஆர். சிவலிங்கம் (சேலம் கிழக்கு – 75), சு. முத்துசாமி (ஈரோடு தெற்கு – 77), சாக்கோட்டை க. அன்பழகன் (தஞ்சாவூர் வடக்கு – 72) ஆகிய முன்னணி நிர்வாகிகள் இந்த வரம்பினால் பாதிக்கப்படவுள்ளனர்.
அதேபோல், புதுக்கோட்டை தெற்கு ரகுபதி (76), மதுரை மாநகர் கோ. தளபதி (70), தேனி தெற்கு நா. இராமகிருஷ்ணன் (77), கே. கே. எஸ். எஸ். ஆர். ராமச்சந்திரன் (77), தூத்துக்குடி தெற்கு அனிதா ஆர். ராதாகிருஷ்ணன் (74) மற்றும் திருநெல்வேலி மேற்கு இரா. ஆவுடையப்பன் (81) ஆகிய 13 மூத்த தலைவர்களும் தங்களது மாவட்டச் செயலாளர் பதவிகளில் இருந்து விடுவிக்கப்படவுள்ளதாக தகவல்கள் வெளியாகியுள்ளன. இந்த நகர்வு கட்சிக்குள் பெரும் மாற்றத்தையும், அடுத்தகட்ட இளைஞர் தலைமுறைக்கு புதிய வாய்ப்புகளையும் ஏற்படுத்தும் என எதிர்பார்க்கப்படுகிறது.