“தவம் இருந்து பெற்ற புள்ளை சார்”…. யூடியூப் மோகத்தால் பறிபோன 11 வயது சிறுவனின் உயிர்…. தின்னர் பரிசோதனையால் நேர்ந்த கொடூரம்…. கதறும் பெற்றோர்….!

திருப்பத்தூர் மாவட்டம் ஜோலார்பேட்டை அடுத்த பார்சம்பேட்டை சோலையூர் கிராமத்தைச் சேர்ந்த இளையரசின் 11 வயது மகன் கவின், அங்குள்ள தனியார் பள்ளியில் 6ஆம் வகுப்பு பயின்று வந்தார். படிப்பில் படுசுட்டியான அவருக்கு அறிவியல் ஆராய்ச்சிகள் செய்வதில் அதிக ஆர்வம் இருந்ததால், பள்ளி அறிவியல் கண்காட்சிகளிலும் பங்கேற்றுள்ளார். இதன் தொடர்ச்சியாக, தனது தந்தையின் கைப்பேசியில் யூடியூப் காணொளிகளைப் பார்த்து புதிய பரிசோதனைகளைச் செய்து பார்ப்பதை வழக்கமாகக் கொண்டிருந்தார்.

இந்த நிலையில், வீட்டின் மாடியில் வர்ணம் பூசுவதற்காக வைக்கப்பட்டிருந்த தின்னரைக் கொண்டு பரிசோதனை செய்ய கவின் முயன்றுள்ளார். அப்போது எதிர்பாராதவிதமாக தின்னர் அவரது ஆடையில் பட்டு திடீரென தீப்பற்றியது. சிறுவனின் அலறல் சத்தம் கேட்டு ஓடிவந்த தந்தை இளையரசு, மகனைக் காப்பாற்ற முயன்றபோது அவருக்கும் பலத்த தீக்காயங்கள் ஏற்பட்டன. உடனடியாகத் திருப்பத்தூர் அரசு மருத்துவமனையிலும், பின்னர் மேல் சிகிச்சைக்காக சென்னை கீழ்ப்பாக்கம் அரசு மருத்துவமனையிலும் அனுமதிக்கப்பட்ட கவின், தீவிர சிகிச்சைப் பலனின்றி பரிதாபமாக உயிரிழந்தார்.

குழந்தைகள் இணையத்தில் என்ன மாதிரியான காணொளிகளைப் பார்க்கிறார்கள் என்பதைப் பெற்றோர் தீவிரமாகக் கண்காணிக்க வேண்டும் என்று காவல்துறையினர் எச்சரித்துள்ளனர். மேலும், தின்னர், பெட்ரோல், டீசல் போன்ற எளிதில் தீப்பற்றக்கூடிய ஆபத்தான பொருட்களைக் குழந்தைகளின் கைகளில் கிடைக்காதவாறு பாதுகாப்பாக வைத்திருக்க வேண்டும் என்றும், எந்தவொரு அறிவியல் பரிசோதனையையும் பெரியவர்களின் நேரடி மேற்பார்வையின்றிச் செய்யக் குழந்தைகளை அனுமதிக்கக் கூடாது என்றும் அறிவுறுத்தப்பட்டுள்ளது.

கவினின் இந்த அகால மரணம் அப்பகுதியில் பெரும் சோகத்தை ஏற்படுத்தியுள்ளது. எளிதில் தீப்பற்றும் தன்மை கொண்ட தின்னர் போன்ற இரசாயனப் பொருட்கள் உடலின் தோலில் பட்டால் தீவிர எரிச்சல் மற்றும் காயங்களை ஏற்படுத்துவதோடு, அதிலிருந்து வெளிவரும் நச்சுப் புகை நரம்பு மண்டலத்தையும் சுவாசப் பாதையையும் கடுமையாகப் பாதிக்கக்கூடியது என்பதால், வீடுகளில் இத்தகைய பொருட்களைக் கையாள்வதில் கூடுதல் விழிப்புணர்வும் கவனமும் அவசியமாகிறது.