“இருமலால் பறிபோன உயிர்” ‘கோல்ட்ரிஃப்’ மருந்து குடித்த 4 வயது சிறுவன் பலி… மருந்து நிறுவனத்தின் மீது அதிரடி நடவடிக்கை…!!

உத்தராகண்ட் மாநிலத்தில் ‘கோல்ட்ரிஃப்’ (Coldrif) என்ற இருமல் மருந்தைக் குடித்த 4 வயது சிறுவன் சிகிச்சை பலனின்றி உயிரிழந்த சம்பவம் அதிர்ச்சியை ஏற்படுத்தியுள்ளது. கடந்த அக்டோபர் மாதம் இந்த மருந்தை உட்கொண்ட ஹர்ஷ் என்ற அந்த சிறுவன், உடல் உறுப்புகள் பாதிக்கப்பட்டு நீண்ட நாட்களாகக் கோமா நிலையில் இருந்து வந்துள்ளார். சுமார் 4 மாதங்கள் நாக்பூர் எய்ம்ஸ் மருத்துவமனையில் தீவிர சிகிச்சைப் பிரிவில் இருந்த அவர், கடந்த ஞாயிற்றுக்கிழமை (பிப். 1, 2026) இரவு உயிரிழந்தார்.

இந்தக் குறிப்பிட்ட இருமல் மருந்தில் டை எத்திலீன் கிளைக்கால்   என்ற நச்சுத்தன்மை கொண்ட வேதிப்பொருள் அதிகளவில் இருந்தது ஆய்வில் கண்டறியப்பட்டது. இது சிறுநீரக செயலிழப்பு மற்றும் நரம்பு மண்டல பாதிப்புகளை ஏற்படுத்தக்கூடியது. ஏற்கனவே மத்தியப் பிரதேசம் மற்றும் ராஜஸ்தான் ஆகிய மாநிலங்களில் இம்மருந்தை உட்கொண்ட 20-க்கும் மேற்பட்ட குழந்தைகள் உயிரிழந்துள்ள நிலையில், உத்தராகண்ட் அரசு இந்த மருந்துக்குத் தடை விதித்து விசாரணையைத் தீவிரப்படுத்தியுள்ளது. காஞ்சிபுரத்தைச் சேர்ந்த மருந்து உற்பத்தி நிறுவனத்தின் உரிமையாளர் மீது வழக்குப் பதிவு செய்யப்பட்டு, சட்ட நடவடிக்கைகள் மேற்கொள்ளப்பட்டு வருகின்றன.