பாஜக பெண் நிர்வாகியும், பிரபல கார் ரேசருமான அலிசா அப்துல்லா அளித்த அவதூறு புகாரின் அடிப்படையில், தலைமறைவாக இருந்த யூடியூபர் முக்தார் கர்நாடக மாநிலம் மைசூரில் வைத்து போலீசாரால் அதிரடியாகக் கைது செய்யப்பட்டுள்ளார். கடந்த 2022-ஆம் ஆண்டு பாஜகவில் இணைந்த அலிசா அப்துல்லா, கட்சியின் இளைஞர் மற்றும் விளையாட்டு மேம்பாட்டு பிரிவின் மாநில செயலாளராகப் பொறுப்பு வகித்து வந்தார். சமீபத்தில் இவருக்குக் குழந்தை பிறந்த நிலையில், தீவிர அரசியலில் இருந்து தற்காலிகமாக ஒதுங்கியிருந்தார். இந்தச் சூழலில், தன்னைப்பற்றியும் தனது குழந்தையைப் பற்றியும் சமூக வலைத்தளங்களில் அவதூறாகவும், கண்ணியக்குறைவாகவும் பேசியதாக யூடியூபர் முக்தார் மற்றும் முன்னாள் பாஜக நிர்வாகி திருச்சி சூர்யா சிவா ஆகிய இருவர் மீதும் சென்னை காவல் ஆணையரகத்தில் அவர் பரபரப்பு புகார் ஒன்றை அளித்திருந்தார்.
அலிசா அப்துல்லா அளித்த இந்தப் புகாரின் பேரில் உடனடியாக வழக்குப் பதிவு செய்த போலீசார், முதற்கட்டமாக திருச்சி சூர்யாவை கைது செய்து சிறையில் அடைத்தனர். ஆனால், இந்த வழக்கில் தொடர்புடைய யூடியூபர் முக்தார் போலீசாரின் பிடியில் சிக்காமல் கடந்த ஒரு வாரமாகத் தலைமறைவாக இருந்து வந்தார். அவரைப் பிடிக்க தனிப்படை அமைத்து தீவிரமாகத் தேடி வந்த நிலையில், அவர் கர்நாடக மாநிலம் மைசூரில் பதுங்கியிருப்பது தெரியவந்தது. அங்கு விரைந்த சென்னை தனிப்படை போலீசார் முக்தாரை மடக்கிப் பிடித்துக் கைது செய்தனர். தற்போது அவரை சென்னைக்கு அழைத்து வந்து தீவிர விசாரணை நடத்துவதற்கான ஏற்பாடுகள் செய்யப்பட்டு வருகின்றன.
கைது செய்யப்பட்டுள்ள யூடியூபர் முக்தார் மீது ஏற்கனவே பல்வேறு காவல் நிலையங்களில் பல வழக்குகள் நிலுவையில் உள்ளன என்பது குறிப்பிடத்தக்கது. சமூக வலைத்தளங்களில் ஆபாசமாகப் பேசுவது மற்றும் பெருந்தலைவர் காமராஜர் குறித்து அவதூறாகப் பேசியது உள்ளிட்ட குற்றச்சாட்டுகளின் கீழ் கடந்த ஆட்சியிலேயே அவர் மீது வழக்குகள் பதியப்பட்டிருந்தன. அப்போதெல்லாம் கைதாகாமல் தப்பித்து வந்த முக்தார், தற்போது பெண் நிர்வாகி அலிசா அப்துல்லா மற்றும் அவரது பச்சிளம் குழந்தையைக் கொச்சைப்படுத்திப் பேசிய விவகாரத்தில் சட்டப் பூர்வமாக போலீசாரிடம் சிக்கியுள்ளார். இச்சம்பவம் இணையவாசிகள் மற்றும் அரசியல் வட்டாரத்தில் பெரும் பரபரப்பை ஏற்படுத்தியுள்ளது.