முன்விரோதம் இல்லாதது போல் நடித்து…. போதையில் இருந்தபோது வெல்டிங் தொழிலாளிக்கு நேர்ந்த விபரீதம்…. கூடவே இருந்து குழிபறித்த நண்பர்கள்…. நெஞ்சை உலுக்கும் கொடூரம்….!

திருவள்ளூர் மாவட்டம் பொன்னேரி அருகே முன்விரோதம் காரணமாக 27 வயது வெல்டிங் தொழிலாளி, நண்பர்கள் போல் பழகிய கும்பலால் மது குடிக்க அழைத்துச் செல்லப்பட்டு, முகம் சிதைத்து கொடூரமாகக் கொலை செய்யப்பட்டுள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளது. குன்னமஞ்சேரி பகுதியைச் சேர்ந்த சுனில் என்ற இளைஞரே இவ்வாறு பழிக்கு பழியாக வெட்டிப் படுகொலை செய்யப்பட்டுள்ளார். தனியார் தொழிற்சாலையில் வெல்டராக பணியாற்றி வந்த இவர், சம்பவத்தன்று இரவு வீட்டை விட்டு வெளியே சென்ற நிலையில், ஆரணியாற்று பாலத்தின் கீழ் ரத்த வெள்ளத்தில் பிணமாகக் கண்டெடுக்கப்பட்டார்.

காவல்துறையினரின் முதற்கட்ட விசாரணையில், இக்கொலைக்கு பின்னணியில் இருந்த திடுக்கிடும் முன்விரோதக் கதைகள் வெளிவந்துள்ளன. கடந்த ஆண்டு சின்னக்காவனம் பகுதியில் நடைபெற்ற ஒரு துக்க நிகழ்வின் போது, சுனிலுக்கும் தீபன் (24) என்பவரின் நண்பர்களுக்கும் இடையே தகராறு ஏற்பட்டுள்ளது. அப்போது சுனில், தீபனின் நண்பர்களை கத்தியால் தாக்கியதாகக் கூறப்படுகிறது. இந்த சம்பவத்திற்கு எப்படியாவது பழிவாங்க வேண்டும் என்று தீபனும் அவனது கூட்டாளிகளும் நீண்ட நாட்களாக சமயம் பார்த்துக் காத்துக் கொண்டிருந்தனர்.

சம்பவத்தன்று தங்களது பகையை மறைத்துக் கொண்டு, முன்விரோதம் எதுவும் இல்லாதது போல சுனிலிடம் தீபன் கும்பல் மிகவும் இயல்பாகப் பேசியுள்ளது. அவரை நம்பவைத்து மது அருந்துவதற்காக தனியான ஒரு இடத்திற்கு அழைத்துச் சென்றுள்ளனர். சுனில் போதையின் உச்சத்துக்கேறிய தருணத்தைப் பயன்படுத்திய அந்த கும்பல், தாங்கள் மறைத்து வைத்திருந்த ஆயுதங்களால் அவர் மீது சரமாரியாகத் தாக்குதல் நடத்தியுள்ளது. மேலும், கத்தி, பீர் பாட்டில் மற்றும் கற்களால் சுனிலின் முகத்தை மிகக் கொடூரமாக சிதைத்துவிட்டு அங்கிருந்து தப்பியோடியுள்ளனர்.

தற்போது இக்கொலை வழக்கு தொடர்பாக பொன்னேரி போலீசார் தீவிர விசாரணை மேற்கொண்டு, சந்தேகத்தின் பேரில் சிலரை பிடித்து விசாரித்து வருகின்றனர். தலைமறைவாக உள்ள முக்கிய குற்றவாளியான தீபன் மற்றும் அவனது நண்பர்களைப் பிடிக்க தனிப்படைகள் அமைக்கப்பட்டுள்ளன. இதற்கிடையில், குற்றவாளிகள் அனைவரும் கைது செய்யப்படும் வரை சுனிலின் உடலை வாங்க மாட்டோம் எனக்கூறி அவரது உறவினர்கள் போராட்டத்தில் ஈடுபட்டுள்ளதால், அப்பகுதியில் பதற்றமான சூழல் நிலவி வருகிறது.