“பில் அதிகமா வருது…” ஆத்திரத்தில் ஸ்மார்ட் மீட்டரை அடித்து நொறுக்கிய இளம்பெண்… வைரலாகும் வீடியோ…!!

ஸ்மார்ட் மீட்டர் பொருத்தப்பட்டதில் இருந்து மின்சாரக் கட்டணம் வழக்கத்தை விட அதிகமாக வருவதாகக் கூறி, ஆத்திரமடைந்த இளம் பெண் ஒருவர் அந்த மீட்டரை அடித்து உடைத்த சம்பவம் பரபரப்பை ஏற்படுத்தியுள்ளது. இந்தத் தொழில்நுட்பம் வந்த பிறகு சாமானிய மக்கள் கடும் நிதி நெருக்கடிக்கு ஆளாவதாகவும், இது குறித்துப் பலமுறை புகாரளித்தும் அரசு எந்தவித நடவடிக்கையும் எடுக்கவில்லை என்றும் அவர் குற்றம் சாட்டியுள்ளார். பொதுமக்களின் போராட்டங்களைப் பொருட்படுத்தாமல் இத்திட்டத்தைத் தொடர்வது நியாயமற்றது என்பதே அந்தப் பெண்ணின் ஆதங்கமாக உள்ளது.

அதிகரித்து வரும் மின்கட்டண உயர்வால் சாமானியர்கள் கடும் இன்னல்களைச் சந்தித்து வரும் நிலையில், இந்தச் சம்பவம் அரசின் மெத்தனப் போக்கிற்கு எதிரான ஒரு வெளிப்பாடாகப் பார்க்கப்படுகிறது. பல இடங்களில் ஸ்மார்ட் மீட்டர்களுக்கு எதிராகப் போராட்டங்கள் வெடித்தாலும், அதிகாரிகளின் அலட்சியம் தொடர்வதால் மக்கள் இத்தகைய விபரீத முடிவுகளை எடுப்பதாக சமூக வலைதளங்களில் கருத்துக்கள் பகிரப்பட்டு வருகின்றன. இந்த விவகாரத்தில் அரசு தலையிட்டு மக்களின் சுமையைக் குறைக்கத் தேவையான தீர்வுகளை உடனே வழங்க வேண்டும் எனப் பலரும் வலியுறுத்தி வருகின்றனர்.