“கண்ணை மூடிய அந்த 35 விநாடிகள்”…. சென்னை MTC பேருந்தில் நடந்த அதிர்ச்சி சம்பவம்… இளம்பெண்ணுக்கு காத்திருந்த பேரதிர்ச்சி…..!

சென்னையில் மாநகரப் பேருந்தில்பயணம் செய்த இளம்பெண் ஒருவரிடமிருந்து சுமார் 60 ஆயிரம் ரூபாய் மதிப்பிலான இரண்டு செல்போன்கள் மர்மமான முறையில் திருடப்பட்ட சம்பவம் அதிர்ச்சியை ஏற்படுத்தியுள்ளது. கே.கே.நகர் ESI பேருந்து நிறுத்தத்தில் இருந்து 17D எண் கொண்ட பேருந்தில் ஏறிய அந்த இளம்பெண், எழும்பூர் பழைய கமிஷனர் அலுவலகம் அருகே இறங்க திட்டமிட்டிருந்தார். பயணத்தின் போது, அவரது அருகில் அமர்ந்திருந்த வயதான பெண்மணி ஒருவர் உணவு, தண்ணீர் மற்றும் பவர் பேங்க் குறித்து தொடர்ந்து கேள்விகள் கேட்டு அவரது கவனத்தைத் திசைதிருப்பியதாகக் கூறப்படுகிறது.

எழும்பூர் குழந்தைகள் நல மருத்துவமனை அருகே வரை அந்த இளம்பெண்ணிடம் செல்போன்கள் இருந்துள்ளன. அடுத்த நிறுத்தத்தில் இறங்குவதற்காக அவர் இருக்கையிலிருந்து எழுந்தபோது, திடீரென அவரது கண்களில் ஏதோ ஒரு பொடி போன்ற பொருள் விழுந்துள்ளது. இதனால் ஏற்பட்ட எரிச்சலால் அவர் கண்களை மூடிக்கொண்டு தோழியின் கைகளைப் பிடித்துள்ளார். அந்த 35 முதல் 40 விநாடிகளுக்குள், மர்ம நபர்கள் அவரது பையைக் கிழித்து உள்ளிருந்த இரண்டு செல்போன்களையும் நைசாகத் திருடிச் சென்றுள்ளனர். பின்னர் நிலையை உணர்ந்து பார்த்தபோதுதான் செல்போன்கள் காணாமல் போனது தெரியவந்துள்ளது.

இச்சம்பவம் குறித்து காவல்துறையில் புகார் அளித்துள்ள அந்த இளம்பெண், பொதுமக்களுக்கு விழிப்புணர்வு ஏற்படுத்தும் வகையில் சமூக வலைதளங்களில் வீடியோ ஒன்றை வெளியிட்டுள்ளார். அதில், பேருந்துகளில் பயணிக்கும் பொதுமக்கள் தங்களது செல்போன், பணம் போன்ற விலைமதிப்பற்ற உடைமைகளை மிகுந்த கவனத்துடன் பாதுகாத்துக் கொள்ள வேண்டும் என உருக்கமாகக் கேட்டுக்கொண்டுள்ளார். இந்த விழிப்புணர்வு வீடியோ தற்போது இணையத்தில் வைரலாகி வருவதோடு, மாநகரப் பேருந்து பயணிகளிடையே பெரும் பரபரப்பையும் அச்சத்தையும் ஏற்படுத்தியுள்ளது.