சத்தீஸ்கர் மாநிலம் பிலாயில் உள்ள தனியார் கல்லூரியில் மருந்தியல் படித்து வந்த 19 வயது மாணவியான குஷி சாஹு, தனது கல்விச் செலவிற்காக உள்ளூர் உணவகம் ஒன்றில் பகுதி நேரமாகப் பணியாற்றி வந்துள்ளார். இவரைப் பலோடாபஜார் பகுதியைச் சேர்ந்த பிண்டு சாஹு என்ற 24 வயது வாலிபர் காதலிப்பதாகக் கூறித் தொடர்ந்து மனரீதியாகத் துன்புறுத்தி வந்துள்ளார். அந்த வாலிபரின் அநாகரிகமான போக்கினால் அதிருப்தியடைந்த மாணவி, அவரது அலைபேசி எண்களைத் தொடர்பு கொள்ள முடியாதவாறு முற்றிலுமாக பிளாக் செய்துள்ளார். இதனால் ஆத்திரமடைந்த அந்த வாலிபர், மாணவியின் சகோதரரையும், அவர் வேலை செய்த உணவகத்தின் உரிமையாளரையும் நேரில் சந்தித்து, “அவளை வேலையை விட்டு நிறுத்திவிட்டு, என்னைத் திருமணம் செய்துகொள்ளச் சொல்லுங்கள்” என்று பகிரங்கமாக மிரட்டல் விடுத்துள்ளார்.
இணையவழியில் வாங்கிய கூர்மையான கத்தியுடன் வெள்ளிக்கிழமை அன்று மாணவி தங்கியிருந்த விடுதி அறைக்குச் சென்ற அந்த வாலிபர், அங்கு அவர் தனியாக இருந்த சமயத்தில் கொடூரமான முறையில் தகராறில் ஈடுபட்டுள்ளார். முதலில் மாணவியின் கழுத்தை நெரித்துக் கொல்ல முயன்ற அந்த நபர், பின்னர் கத்தியால் அவரது உடல் முழுவதும் பத்து முறைக்கும் மேலாகக் குத்திவிட்டு அங்கிருந்து தப்பியோடியுள்ளார். அறைத்தோழி திரும்பி வந்து பார்த்தபோது ரத்த வெள்ளத்தில் கிடந்த மாணவியை மீட்டு மருத்துவமனைக்குக் கொண்டு சென்ற போதிலும், அதிகப்படியான ரத்தப்போக்கு காரணமாக அவர் ஏற்கனவே உயிரிழந்துவிட்டதாக மருத்துவர்கள் தெரிவித்துள்ளனர். இக்கொடூரச் சம்பவம் குறித்து வழக்குப் பதிவு செய்த காவல்துறையினர், ராய்ப்பூர் நோக்கித் தப்பிச் சென்ற கொலையாளியைச் சனிக்கிழமை அதிரடியாகக் கைது செய்து, குற்றத்தை உறுதி செய்ய அவரை மீண்டும் சம்பவ இடத்திற்கு அழைத்து வந்து விசாரணை நடத்தியுள்ளனர்.