பணமா? நட்பா?… வெறும் ₹2,250-க்கு விலைபோன உயிர்… நண்பனை மின்சாரம் பாய்ச்சி கொன்ற கொடூரம்… இறுதியில் அம்பலமான திடுக்கிடும் உண்மை…!!

உத்தரபிரதேச மாநிலம் லக்னோவின் பிஜ்னோர் பகுதியில், வெறும் 2,250 ரூபாய்க்காக நண்பரையே ஒருவர் மின்சாரம் பாய்ச்சி கொலை செய்துள்ள அதிர்ச்சியூட்டும் சம்பவம் நிகழ்ந்துள்ளது. சச்சின் என்ற இளைஞரை, அவருடைய நண்பரான பிர்ஜு என்பவர் பணத்தாசையால் இந்தக் கொடூரச் செயலுக்கு ஆளாக்கியுள்ளார். இந்தச் சம்பவம் தொடர்பாக காவல் துறையினர் தீவிர விசாரணை மேற்கொண்டு குற்றவாளியைக் கைது செய்துள்ளனர்.

சம்பவத்தன்று சச்சின் தனது பணத்தேவைக்காக, இருசக்கர வாகனத்தை அடகு வைத்து பணம் பெற்றுள்ளார். அந்தப் பணத்தில் இருவரும் மதுபானம் வாங்கி பிர்ஜுவின் அறையில் அருந்தியுள்ளனர். மதுபோதையில் சச்சின் மயங்கி விழுந்த நிலையில், அவரது பையில் மீதமிருந்த 2,250 ரூபாயைக் கண்ட பிர்ஜுவுக்குப் பேராசை ஏற்பட்டுள்ளது. பணத்தை அபகரிக்கும் நோக்கில், மயக்க நிலையில் இருந்த சச்சின் மீது இரும்பு கூலர் மற்றும் மின்சார வயரைப் பயன்படுத்தி மின்சாரம் பாய்ச்சி அவரைப் படுகொலை செய்துள்ளார்.

இந்தக் கொடூரத்திற்குப் பிறகு, பணத்தைத் திருடிக்கொண்ட பிர்ஜு, போலீசாரிடம் சிக்காமல் இருக்க சச்சினின் உடலை வேறொரு வீட்டின் வெளியே வீசியுள்ளார். இதனை ஒரு மின்சார விபத்தாகக் காட்ட அவர் முயன்றுள்ளார். எனினும், சச்சினின் தந்தை மேடிலால் அளித்த புகாரின் பேரில் வழக்குப்பதிவு செய்த போலீசார், அப்பகுதியில் உள்ள சிசிடிவி காட்சிகளை ஆய்வு செய்தனர்,. இதன்மூலம் உண்மை அம்பலமானதையடுத்து, பிர்ஜுவைக் கைது செய்த போலீசார், திருடப்பட்ட 2,250 ரூபாய் மற்றும் கொலைக்குப் பயன்படுத்தப்பட்ட பொருட்களையும் பறிமுதல் செய்தனர்.