ரயில் பயணிகளின் வசதிக்காக இந்திய ரயில்வே அறிமுகப்படுத்தியுள்ள ‘தற்போதைய டிக்கெட் முன்பதிவு’ வசதி, கடைசி நேர அவசரப் பயணங்களுக்குப் பெரும் உதவியாக உள்ளது. வழக்கமாகத் தட்கல் டிக்கெட்டுகளை முகவர்கள் ஆக்கிரமித்துக் கொள்வதால் சாமானியர்களுக்கு வாய்ப்பு கிடைப்பதில்லை என்ற புகாரைத் தீர்க்கவே இந்த முறை கொண்டு வரப்பட்டுள்ளது.
ரயில் நிலையத்திலிருந்து வண்டி புறப்படுவதற்குச் சுமார் 3 முதல் 4 மணி நேரத்திற்கு முன்பு வரை காலியாக உள்ள இருக்கைகளை இந்த முறையில் பதிவு செய்யலாம். ரயிலில் காலியாக இருக்கும் இடங்களை நிரப்புவதோடு, பயணிகளுக்குக் குறைந்த செலவில் இருக்கை கிடைக்க இது வழிவகை செய்கிறது.
இந்தத் தற்போதைய டிக்கெட்டை IRCTC இணையதளம் அல்லது அருகில் உள்ள ரயில் நிலைய கவுண்டர்களில் நேரடியாகச் சென்று பெற்றுக்கொள்ளலாம். இதன் மிக முக்கியமான சிறப்பம்சம் என்னவென்றால், ரயில் கிளம்புவதற்கு 5 முதல் 10 நிமிடங்களுக்கு முன்பு கூட டிக்கெட் எடுக்க முடியும் என்பதுதான்.
மேலும், தட்கல் டிக்கெட்டுகளை விட இதற்கான கட்டணம் சற்றே குறைவாகவே வசூலிக்கப்படுகிறது. கடைசி நேரத்தில் திட்டமிடும் பயணிகளுக்கு இது ஒரு வரப்பிரசாதமாகத் திகழ்வதோடு, பாதுகாப்பான மற்றும் குறைந்த செலவிலான பயணத்தை உறுதி செய்கிறது.