2026-ஆம் ஆண்டுக்கான உலக மகிழ்ச்சி குறியீடு தற்போது வெளியாகியுள்ளது. இதில் ஐரோப்பிய நாடான பின்லாந்து, தனது ஒன்பதாவது தொடர் வெற்றியைப் பதிவு செய்து உலகின் மகிழ்ச்சியான நாடாக நீடிக்கிறது. வலுவான சமூக பாதுகாப்பு வலைகள், குடிமக்களிடையே உள்ள பரஸ்பர நம்பிக்கை மற்றும் உயர்தர வாழ்க்கை முறை ஆகியவை பின்லாந்தை மீண்டும் முதலிடத்தில் அமர்த்தியுள்ளன. இதனைத் தொடர்ந்து ஐஸ்லாந்து மற்றும் டென்மார்க் ஆகிய நாடுகள் டாப் 3 இடங்களைப் பகிர்ந்து கொண்டுள்ளன.
இந்தியாவின் நிலை: சர்வதேச அளவில் 147 நாடுகளிடையே நடத்தப்பட்ட இந்த ஆய்வில், இந்தியா 118-வது இடத்தைப் பெற்றுள்ளது. இந்தியாவின் அண்டை நாடான பாகிஸ்தான் பொருளாதார நெருக்கடிகளுக்கு மத்தியிலும் 109-வது இடத்தைப் பிடித்து இந்தியாவை விட முன்னிலையில் இருப்பது சமூக வலைதளங்களில் விவாதத்தை ஏற்படுத்தியுள்ளது. மற்ற அண்டை நாடுகளான நேபாளம் 92-வது இடத்திலும், சீனா 68-வது இடத்திலும் உள்ளன. இலங்கை (133) மற்றும் வங்கதேசம் (134) ஆகிய நாடுகள் இந்தியாவிற்கு பின் வரிசையில் உள்ளன.
அமெரிக்காவின் சரிவு மற்றும் புதிய மாற்றங்கள்: உலகின் மிகப்பெரிய பொருளாதார நாடான அமெரிக்கா, இந்த வரிசையில் 23-வது இடத்திற்குத் தள்ளப்பட்டுள்ளது. கடந்த சில ஆண்டுகளாகவே அமெரிக்க இளைஞர்களிடையே நிலவி வரும் மன அழுத்தம் மற்றும் தனிமை உணர்வு இந்தச் சரிவுக்குக் காரணமாகக் கூறப்படுகிறது. அதே வேளையில், கோஸ்டாரிகா போன்ற நாடுகள் சமூக உறவுகளுக்கு அளிக்கும் முக்கியத்துவத்தால் 4-வது இடத்திற்கு முன்னேறி உலக நாடுகளின் கவனத்தை ஈர்த்துள்ளன.
மகிழ்ச்சியைத் தீர்மானிக்கும் காரணிகள்: இந்த அறிக்கை வெறும் பொருளாதார வளர்ச்சியை மட்டும் அடிப்படையாகக் கொள்ளாமல், மக்கள் ஒருவருக்கொருவர் காட்டும் அன்பு, உதவி செய்யும் மனப்பான்மை (Generosity) மற்றும் ஊழலற்ற நிர்வாகம் ஆகியவற்றை முக்கியமாகக் கருதுகிறது. குறிப்பாக, இந்த ஆண்டு இளைஞர்களிடையே சமூக ஊடகங்களின் தாக்கம் குறித்து விரிவான ஆய்வு மேற்கொள்ளப்பட்டது. ஒரு நாளைக்கு ஐந்து மணி நேரத்திற்கும் மேலாகச் சமூக ஊடகங்களைப் பயன்படுத்தும் இளைஞர்களிடையே மகிழ்ச்சி குறைந்து காணப்படுவதாக ஆய்வாளர்கள் கவலை தெரிவித்துள்ளனர்.